Ստեփանակերտի և շրջանների բնակավայրերի միջև վերականգնվել են կանոնավոր ուղևորափոխադրումները

Ստեփանակերտի և Արցախի շրջանների բնակավայրերի միջև կանոնավոր ուղևորափոխադրումները վերականգնվել են: Այս մասին տեղեկացրեց «Ստեփանակերտի Կենտրոնական ավտոկայան» ՓԲԸ շահագործման բաժնի պետ Շահեն Գասպարյանը: Նրա խոսքով առայժմ ուղևորների եռուզեռն ավտոկայանում անհամեմատելի է նախապատերազմյան աշխուժության հետ: Այդ ամենով հանդերձ ուղևորափոխադրող երթուղայինները կազմ-պատրաստ սպասում են շրջանների բնակավայրեր մեկնողներին:

«Վերականգնվել են ինչպես միջպետական այնպես էլ միջհանրապետական կանոնավոր ուղևորափոխադրումները: Մասնավորապես միջպետական երթուղին, ամենօրյա ժամանակացույցով և ըստ անհրաժեշտության սպասարկում է 3-4 միկրոավտոբուս:

Ստեփանակերտից դեպի Երևան ուղեվարձը 4500 դրամ է ,իսկ Երևան-Ստեփանակերտ առայժմ անվճար»,-մանրամասնեց Գասպարյանը: Անդրադառնալով միջհանրապետական երթուղիների վերականգնմանն ու կանոնավոր ուղևորափոխադրումներին, Ստեփանակերտի ավտոկայանի պատասխանատուն տեղեկացրեց, որ միջհանրապետականը կանոնավոր ուղևորափոխադրումները մեկնարկել են դեկտեմբերի 1-ից:

«Համեմատաբար թանկացել է Ստեփանակերտ և Մարտակերտ երթուղու ուղևորավարձը: Պատճառը՝ Ստեփանակերտ-Մարտակերտ նոր երթուղին է, որը նախկինի համեմատ երկարել է: Նախկինում ճանապարհն անցնում էր Ակնայով, իսկ այժմ ավտոբուսներն աշխատում են Մարտակերտ-Դրմբոն –Ստեփանակերտ երթուղով: Մինչ պատերազմը ուղեվճարը 800 դրամ էր ,ներկայումս 1000 դրամ, սակայն այս սակագները վերջնական չեն և վերանայվելու են»,-մանրամասնեց մեր զրուցակիցը:

Շահեն Գասպարյանի խոսքով Երևանից ժամանող արցախցիներին, որոնք բնակվում են շրջաններում, տեղափոխելու համար տրամադրվում են Ստեփանակերտում գործող երթուղային ավտոբուսներ:

Խոսելով երթուղու փոփոխությունների ու դրանից առաջացող խնդիրների մասին, Մոխրաթաղ-Մեծ շեն –Ստեփանակերտ երթուղայինի վարորդ Գրիշա Սայիյանը նշեց, որ նախկին ճանապարհով 40 րոպեում էին հասնում Ստեփանակերտ:

«Հիմա մոտ 2 ժամում ենք հասնում: Մեր ճանապարհն այժմ անցնում է Ալաշանով ու Դրմբոնով ՝107 կիլոմետր, իսկ Ստեփանակերտ հասնելու տևողությունն ավելացել է մեկուկես ժամով»,-պարզաբանեց վարորդը:

Մարտակերտ-Ստեփանակերտ երթուղայինի վարորդ Վարդգես Երեմյանը հավելեց, որ իրենց երթուղին նույնպես երկարել է: Նրա խոսքով Մարտակերտից Ստեփանակերտ կամ հակառակ ուղղությամբ մեկնողների թիվն առայժմ փոքր է, սակայն մարդկանց տեղաշարժն աստիճանաբար աշխուժանում է: