Հարգելի' Լիսկա, հեռախոսդ միացրու, սիրուն աղջիկը բարաթդ գտել է
Operativ.am-ն արձագանքելով Սյունիքի բնապահպանների և ակտիվիստների հետևյալ բողոքին, փորձեց կապ հասատատել մարզպետ Սուրեն Խաչատրյանի հետ, ով լսելով կայքի անունը, իրեն բնորոշ «յուրօրինակ» և «սրամիտ» պատասխան տվեց.
«Աղջի'կ ջան, քեզ թվում ա ընկեր Խաչատրյանը պարապ նստած սպասում ա, թե երբ են զանգելու մի քանի հարց տան, որ պատասխանե՞մ, էդ ինչի՞ չեք Սյունիք գալիս, որ զանգում ձայնագրիչ եք միացնում, հարց տալիս, եկեք՝ կպատասխանեմ, եղա՞վ սիրուն աղջիկ»:
Այն հարցին, թե ինչպե՞ս եք պատկերացնում ամեն անգամ Երևանից Սյունիք գնալը մեկնաբանություն ստանալու համար, սիրուն աղջիկը լսեց միայն ընդհատված կապի ազդանշանը՝ տու-տու-տու:
Ինչևէ, հարգարժան մարզպետը միշտ էլ աչքի է ընկել էթիկայի կանոնների «իմացությամբ և պատշաճ կերպով պահպանմամբ», ուստի այնքան էլ զարմանալի չէր նրա պատասխանը:
Մեզ այդպես էլ չհաջողվեց նրանից ճշտել, թե նա գոնե հասկանու՞մ է իր ստորագրած պայմանագրի լրջությունը, քանի որ ինչպես իրավամբ ակտիվիստներն ու բնապահպաններն են նշում՝ Իրանում հատկապես ոչխարների մոտ տարածված են տարբեր հիվանդություններ, որոնք կտարածվեն նաև Հայաստանում և որ ամենակարևորն է՝ դրանք վտանգավոր են նաև մարդկանց համար:
Ի վերջո, չպետք է մոռանալ նաև այն հանգամանքը, որ իրանցիները Սյունիքում բնակվելով, կարող են մի շարք տեղեկություններ հավաքել տարածքի ռազմական գաղտնիքների մասին ու հետո դրանք հայտնել համապատասխան վայրեր:
«Այս հարցը պետք է նրանք քննարկեն առաջին հերթին սյունիքցիների հետ: Մարզպետը իրավունք չունի գնալ ինչ-որ բան ստորագրել ու հետո ժողովրդին հրամցնել: Մենք բազմիցս ենք դիմել մարզպետարան, բայց ոչ մեկի հետ չի հաջողվում զրուցել: Դիմել ենք նաև Ազգային անվտանգություն, բայց սա էլ դեռևս ապարդյուն»,- նշում է բնապահպան ակտիվիստ Գեղամ Գալստյանը:
Հիշեցնենք, որ հունվարի 14-ին Սյունիքի մարզպետ Սուրեն Խաչատրյանի ղեկավարությամբ պատվիրակություն էր մեկնել Իրանի Արևելյան Ադրբեջան նահանգ, որտեղ գյուղատնտեսության ոլորտում համագործակցության մասին հուշագիր է ստորագրվել երկու երկրի մարզերի միջև:
Համագործակցության շրջանակում նախատեսվում է ոչխարաբուծության նպատակներով Սյունիքի արոտավայրերը վարձակալությամբ տալ Արևելյան Ադրբեջան նահանգին։ Ըստ նույն հուշագրի՝ 50 հազ. հա արոտավայր տրամադրվելու է մինչև 10 տարի ժամկետով: Եվս 2000 հա կտրամադրվի որպես բնակավայր: Այստեղ արածելու է առնվազն 50 հազ. եղջերավոր:
Քանի որ Սյունիքի մարզպետը հերքում է այս համաձայնագրի իսկությունը, հատուկ մեր սիրելի մարզպետի համար տեղադրում ենք համաձայնագրի պատճենը, ասելով՝ հարգելի Լիսկա, բարաթը գտել ենք, ուստի՝ «թուղթ-թանաքից ոչ մի իսան փախնողը չի...»: