Թրամփը կարծում է, որ ինքը և Պուտինը կցանկանային համաձայնության գալ Ուկրաինայի հարցով գործարքի շուրջ

ԱՄՆ նախագահ Դոնալդ Թրամփը կարծիք է հայտնել, որ թե՛ ինքը, թե՛ Ռուսաստանի նախագահ Վլադիմիր Պուտինը կցանկանային գործարք կնքել ռուս-ուկրաինական հակամարտության կարգավորման շուրջ։ «Արմենպրես»-ի փոխանցմամբ՝ այդ մասին նա հայտարարել է Սպիտակ տանը լրագրողների հետ շփվելիս։

Թրամփին խնդրել են պարզաբանել, թե ռուսական կողմի հետ շփման ընթացքում նա փորձում է արդյոք պայմանավորվել ՌԴ նախագահի հետ հանդիպման մասին։

«Դե, ես չեմ կարող ձեզ ասել, թե ինչի մասին եմ խոսում, բայց մենք բանակցություններ ենք վարում խմբային մակարդակով: Կարծում եմ, որ նա կցանկանար գործարք կնքել, բայց տանգոյի համար անհրաժեշտ են երկուսը», - ասել է նա:

Թրամփը հրաժարվել է ուղղակիորեն պատասխանել այն հարցին, թե անմիջականորեն շփվել է արդյոք Պուտինի հետ։

«Չեմ ցանկանում խոսել դրա մասին, դա ձեզ չի օգնի: Բայց մենք կցանկանայինք գործարք կնքել, եթե դա հնարավոր է», - նշել է ԱՄՆ նախագահը:

Թրամփը վերջին շաբաթներին շատ անգամ է ցանկություն և պատրաստակամություն հայտնել զրուցելու Պուտինի հետ։ Ընդ որում, որևէ կայացած շփման մասին պաշտոնապես չի հաղորդվել: Թրամփի հետ Պուտինի վերջին զրույցը, որի մասին տեղեկությունը կա Կրեմլի կայքում, թվագրված է 2020 թվականի հուլիսի 23-ով։

Բացի այդ, Fox News հեռուստաալիքին տված հարցազրույցում Թրամփը հայտնել է, որ ռուս-ուկրաինական հակամարտության կարգավորման հարցում մեծ առաջընթաց է գրանցվել։

«Կարծում եմ, որ մենք հսկայական առաջընթաց ենք գրանցել վերջին շաբաթվա ընթացքում: Մենք գործ ունենք Ռուսաստանի հետ, մենք գործ ունենք Ուկրաինայի հետ: Կարծում եմ՝ ինչ-որ բան տեղի կունենա», - ասել է նա:

Միևնույն ժամանակ, Սպիտակ տանը լրագրողների հետ շփման ընթացքում ԱՄՆ նախագահը հնարավոր է համարել, որ այս շաբաթ կզրուցի Ուկրաինայի նախագահ Վոլոդիմիր Զելենսկիի հետ։