Սպիտակարյունություն. վաղ բուժումն առավել արդյունավետ է

Լեյկեմիան օրգանիզմի արյունաստեղծ հյուսվածքների, այդ թվում՝ ոսկրածուծի և ավշային համակարգի քաղցկեղն է:

Լեյկոզը սովորաբար ներառում է արյան սպիտակ բջիջները (լեյկոցիտներ): Արյան սպիտակ բջիջները վարակի դեմ պայքարող մասնիկներ են, որոնք սովորաբար աճում և բազմանում են կանոնավորված, երբ օրգանիզմը զգում է դրանց կարիքը: Սակայն, լեյկոզով հիվանդ մարդկանց մոտ ոսկրածուծն արտադրում է արյան ոչ նորմալ (ախտաբանական) սպիտակ բջիջների ավելցուկային քանակություն, որոնք պատշաճ ձևով չեն գործում: Մեծաքանակ ոչ նորմալ բջիջները մուտք են գործում արյան հուն և խառնվում-փոխարինում առողջ բջիջներին, որի արդյունքում օրգանիզմում պակասում են առողջ արյան բջիջները, ինչն էլ բերում է ախտանիշների առաջացմանը։ Ախտահարված բջիջները նաև կարող են կուտակվել տարբեր օրգան համակարգերում՝ լյարդ, փայծաղ, թոքեր, երիկամներ կամ ուղեղ, փոխանցում է Aysor.am-ը։

Լեյկոզի բուժումը կարող է լինել բարդ՝ կախված լեյկոզի տեսակից և այլ գործոններից: Սակայն կան մոտեցումներ և միջոցներ, որոնք կարող են օգնել բուժումը հաջող դարձնելուն: Վաղ բուժումն առավել արդյունավետ է՝ հատկապես հիվանդության սուր ընթացքի ժամանակ:

Կախված լեյկոզի (լեյկեմիայի) տեսակից, կարող են զարգանալ ամենատարբեր ախտանիշներ:

Լեյկոզի ախտանիշները կախված են ախտահարված արյան սպիտակ բջիջների թվից և այն հանգամանքից, թե որտեղ են դրանք կուտակվում: Ի տարբերություն սուր լեյկոզի, քրոնիկ ընթացքի ժամանակ վաղ ախտանիշները կարող են բացակայել, իսկ հիվանդությունը հայտնաբերվի պատահականորեն արյան ընդհանուր քննությամբ:

Լեյկոզի ամենատարածված ախտանիշներից են՝

մշտական հոգնածության զգացում և թուլություն,

անեմիայի նշաններ՝ գունատություն, թուլություն, հևոց,

հաճախակի կամ ծանր վարակներ, օրինակ՝ ստոմատիտներ, վերքերի և քերծվածքների թարախակալում,

հեշտ արյունահոսում (օրինակ՝ քթային արյունահոսություններ) կամ արյունազեղումներ (կապտուկներ),

առատ քրտնարտադրություն, հատկապես գիշերային ժամերին,

չնախատեսված քաշի կորուստ:

Լեյկոզի ավելի հազվադեպ հանդիպող ախտանիշներից են՝

դող կամ սարսուռ,

ոսկրային ցավ,

ետկրծոսկրային ցավեր,

կետային (պետեխիալ) ցանավորում,

գլխացավեր կամ տեսողության խնդիրներ,

փսխումներ,

փայծաղի կամ ավշային գեղձերի մեծացում:

Լեյկոզի ախտանիշները հաճախ անորոշ և ոչ առանձնահատուկ են: Լեյկոզի վաղ նշանները կարող են նմանվել ընդհանուր մրսածության կամ այլ տարածված հիվանդությունների ախտանիշներին: Երբեմն լեյկոզը հայտնաբերվում է այլ առիթով կատարված արյան թեստի միջոցով: