Տիրան Խաչատրյանին ներկայացված մեղադրանքը փուչ է․ փաստաբան

Իրավական առումով Տիրան Խաչատրյանին ներկայացված մեղադրանքը փուչ է, իսկ կալանքը պատժի տարրեր է պարունակում՝ առանց դատավճռի։ Այս մասին «Փաստինֆո»-ի հետ զրույցում ասաց ԶՈՒ ԳՇ պետի նախկին տեղակալ, գեներալ-լեյտենանտ, «Ազգային հերոս» Տիրան Խաչատրյանի պաշտպան Արմեն Անդրիկյանը։

Ինչպես արդեն տեղեկացրել ենք՝ հունվարի 4-ին ձերբակալվել, ապա՝ կալանավորվել է Տիրան Խաչատրյանը։ Վերջինիս մեղադրանք է առաջադրվել 44-օրյա պատերազմի օրերին՝ ռազմական դրության ընթացքում, իր ծառայողական պարտականությունների կատարման նկատմամբ իբրև անփույթ վերաբերմունքի համար, որն առաջացրել է ծանր հետևանքներ, սակայն գեներալ-լեյտենանտը մեղադրանքը չի ընդունում։

Արմեն Անդրիկյանը «Փաստինֆո»-ի հետ զրույցում հայտնեց, որ գործն ուղարկվել է Սյունիքի մարզի ընդհանուր իրավասության դատարան, սակայն դեռևս առկա չէ տեղեկություն՝ մակագրման վերաբերյալ։ Ինչ վերաբերում է կալանավորման որոշման դեմ բողոքին, որի վերաբերյալ որոշման հրապարակումը նախատեսված էր հունվարի 3-ին, սակայն, պաշտպանի գնահատմամբ, անհայտ և անհասկանալի պատճառներով որոշման հրապարակումը հետաձգվել է՝ 10 օրով։ Ընդ որում, հետաձգման վերաբերյալ գրավոր փաստաթուղթ չի ներկայացվել, պաշտպանին այդ մասին հայտնել են բանավոր։ Ընդ որում, քրեական վարույթը քննվում էր 2020թ․-ից, հինգ տարի նախաքննություն է իրականացվել, 2025թ․ հունվարին Տիրան Խաչատրյանին ձերբակալում են՝ կալանավորման ներկայացնելու համար, կալանավորում՝ հիմքում դնելով այն հանգամանքը, որ «ակտիվ քննչական գործողություններ» պետք է իրականացնեն, իսկ կալանավորումից մեկ-երկու օր հետո քննչական գործողություններ են իրականացվել՝ չորս անձի հետ առերեսում է իրականացվել, հետո գործն ուղարկել դատարան։

«Տիրան Խաչատրյանը 1,5 ամիս նստած սպասում է, որ գործն ուղարկեն դատարան, մինչդեռ, կալանավորման հիմքում դրել էին, որ պետք է ակտիվ քննչական գործողություններ իրականացվեն»,- ասաց փաստաբանը։

Փաստաբանը չմանրամասնեց, թե կոնկրետ ում հետ է իրականացվել առերես հարցաքննությունը, միայն նշեց՝ ՊՆ՝ այդ օրերին՝ հարավային խմբավորումների սպայական ղեկավար կազմն է, նրանց մի մասը շարունակում է ծառայությունը՝ ՊՆ-ում։ Քրեական գործով այլ ցուցմունքներ ևս կան, սակայն վարույթն իրականացնող մարմինը գտել է, որ պետք է չորս անձանց հետ առերեսումներ տեղի ունենան։

Մինչև ձերբակալությունն՝ այս հինգ տարիների ընթացքում Տիրան Խաչատրյանի մասնակցությամբ բազմաթիվ քննչական գործողություններ են իրականացվել, փաստաբանի փոխանցմամբ՝ վկայի կարգավիճակով ավելի քան տասն անգամ հարցաքննվել է՝ նույն հանգամանքների վերաբերյալ։

«Այնպես չէ, որ այդ հանգամանքները նախկինում անհայտ են եղել, հիմա հայտնվեցին։ Ավելի քան տասն անգամ հարցաքննվել է, դրանից հետո՝ որևէ գործողություն չի իրականացվել, հիմա՝ վերջին պահին ձերբակալել են, կալանավորել, գործն ուղարկում են դատարան»,- ասաց փաստաբանը։

Իսկ թե ինչ խնդիր էին լուծում՝ այդ պայմաններում կալանավորելով՝ փաստաբանը նշեց՝ այս կալանքը պատժի տարրեր է պարունակում՝ առանց դատարանի՝ օրինական ուժի մեջ մտած դատավճռի։

«Իրավական առումով՝ որևէ խնդիր ես չեմ տեսնում՝ լուծման համար»,- ասաց փաստաբանը։

Հարցին՝ փորձու՞մ են պատերազմի պարտությունը բարդել գեներալների վրա՝ փաստաբանը զերծ մնաց գնահատականներից, միայն ընդգծեց՝ իրավական առումով այդ մեղադրանքը փուչ է։

Դատաքննությունից պաշտպանության կողմի ակնկալիքները մեծ են, սակայն արդարության մասին խոսելու համար փաստաբանը կարևորում է, որ դատաքննությունը դռնբաց լինի։

«Այնպես չլինի, որ ձևական առումով ասեն՝ ռազմական կամ պետական գաղտնիք է պարունակում, դռնփակ անցկացնեն։ Մենք վստահ ենք Տիրան Խաչատրյանի անմեղության վրա, վստահ ենք, որ դա հաստատվելու է, բայց դրա ճանապարհը շատ ավելի հեշտ կանցնենք, որ դատաքննությունն անցնի դռնբաց և հասարակությունը տեղեկացվի, թե ինչ է տեղի ունեցել»,- ասաց Անդրիկյանը՝ հավելելով, որ պնդելու են, որ դատաքննությունը դռնբաց լինի, հանրությունը տեսնի, թե այդ օրերին ինչ է տեղի ունեցել և տեղեկություն ստանա նաև Տիրան Խաչատրյանի մեղադրանքի մասով։