Եթե ինչ-որ մեկը Մարությանին տեսանյութից հանել է, դա ամոթալի է. Տիգրան Ավինյան

Եթե ինչ-որ մեկը «Ազգային առաջընթաց» կուսակցության քաղաքապետի թեկնածու, Երեւանի նախկին քաղաքապետ Հայկ Մարությանին տեսանյութից հանել է, դա ամոթալի է: Այս մասին այսօր՝ օգոստոսի 25-ին, նախընտրական քարոզարշավի ընթացքում ասաց «Քաղաքացիական պայմանագիր» կուսակցության՝ Երեւանի քաղաքապետի թեկնածու Տիգրան Ավինյանը:

«Իսկ ո՞վ է Մարությանի թիմը: Ես չեմ ուզում կոնկրետ մեկնաբանել: Եթե ինչ-որ մեկն իրեն տեսանյութից հանել է, դա ամոթալի է: Մյուս կողմից այն ինչը, որ իրականացրել է Կառավարությունը, Երեւանի ավագանին, դա նախաձեռնել է փոխվարչապետ Տիգրան Ավինյանը եւ դա վերագրել միայն մեկ հոգու, որն իրականացրել է մի ամբողջ քաղաքական թիմ: Կառավարությունն է այդ վարկի պատասխանատուն, կառավարությունն է այսօր այդ վարկը մարում, նախաձեռնել է իմ գրասենյակը: Առհասարակ խոշոր որեւէ ծրագիր մեկ մարդը չի կարող անել, դա պետք է անի քաղաքական թիմը»,- ասաց Ավինյանը:

Անդրադառնալով դիտորդական առաքելություն իրականացնող կազմակերպությունների կողմից ՀՀ իշխանություններին վարչական ռեսուրս չարաշահելու մեջ մեղադրելուն՝ Ավինյանն արձագանքեց. «Իսկ այդ մարդը կա՞ր, որը հասկանում էր, որ այդ ծավալի խնդիրրները, որը Երեւանն ունի, այն բյուջեի շրջանակում, որը Երեւանն ունի, ուղղակի լուծելի չեն: Երբ մարդիկ պահանջ են բարձրացնում, ասում են՝ կոյուղին, մանկապարտեզը, բակը, մյուսը եւ այլն, թող այն ժամանակ էլ մարդը գնար, պտտվեր, հասկանար՝ ինչ պահանջ կա, եւ կառավարությանն իր պահանջը կներկայացներ եւ կառավարությունն էլ, վստահ եմ, կբավարարեր»:

Ավելի վաղ Մարությանը հայտարարել էր, որ ՔՊ-ն իրենից գողացել է նախընտրական հոլովակը եւ տարածել իր ֆեյսբուքյան իր էջում, ինչպես նաեւ իրեն ջնջել կադրից: