Փաշինյանը՝ 11 մարդու կյանք խլած ավտովթարի մասին

Կառավարության նիստի ժամանակ վարչապետ Նիկոլ Փաշինյանն անդրադարձավ Շիրակի մարզում 11 մարդու կյանք խլած ողբերգական ավտովթարին՝ նշելով, որ ավտովթարի մասնակից վարորդները ունեցել են և՛ տեխզննում, և՛ ԱՊՊԱ պայմանագիր, և՛ իրավազոր վարորդական իրավունքներ:

«Ընդ որում, մենք վարորդների ճանապարհային երթևեկության խախտումների հետագիծն ենք դուրս բերել և ոչ մի առանձնահատուկ բան չկա։ Չենք կարող ասել, որ վարորդները առանձնահատուկ խախտումներ անելու հակված են եղել։ Կարծում եմ, որ այնպիսի խախտումներ են, որ յուրաքանչյուր վարորդի հետ անպայման տեղի կունենար։ Դեպքը քննությունը կպարզի»,- ասաց վարչապետը։

Քննչական կոմիտեի նախագահ Արգիշտի Քյարամյանը տեղեկացրեց վարչապետին, որ ավտովթարի դեպքով փորձաքննություն է նշանակված։

«Փորձաքննության արդյունքներով կհասկանանք, թե կա արդյոք խախտում, թե՞ ոչ։ Եթե կարձանագրվի խախտում, փորձագետը կասի, թե ով է մեղավոր»,- նշեց Քյարամյանը։

Վարչապետի խոսքով՝ ճանապարհների անվտանգության միջոցառումները պետք է լինեն շարունակական։

«Իմ գլխավորությամբ գործում է ճանապարհային երթևեկության անվտանգության ապահովմանն ուղղված աշխատանքային խումբ, որը փորձում է վերլուծել ավտովթարները, դրանց պատճառները, «սև կետեր» կոչված հատվածներն են դուրս բերվում։ Սա մի աշխատանք է, որն անընդհատ պետք է արվի։ Ընդ որում, անկախ նրանից՝ այսպիսի մեծ մասշտաբի ողբերգության հետ առերեսվում ենք, թե ոչ»,- ասաց Փաշինյանը։

Օգոստոսի 14-ին Երևան-Գյումրի ավտոճանապարհին տեղի ունեցած վթարի հետևանքով 11 մարդ մահացել է։ Միմյանց էին բախվել «Զիլ» մակնիշի բեռնատարը և «Ֆոլկսվագեն» մակնիշի միկրոավտոբուսը։ Միկրոավտոբուսի ուղևորները զբոսաշրջիկներ էին, որոնք վերադառնում էին Արևմտյան Հայաստան կատարած ուղևորությունից։