Ո՞ր երգը կատարեցին երկու անգամ և ինչո՞ւ Ժակլինը հուզվեց. Ladaniva խմբի երևանյան մենահամերգի էմոցիաները

Հայկական ժողովրդականից մինչև բալկանյան երգեր, հին ու սիրված հիթեր, ինչպես նաև` նոր կատարումներ... Կարեն Դեմիրճյանի անվան մարզահամերգային համլիրի բեմում ֆրանսիական Ladaniva խումբն էր` լի էներգետիկայով, էմոցիաներով ու հանդիսատեսի հանդեպ երախտագիտությամբ:

Երևանում ելույթ ունենալը խմբի վոկալիստ Ժակլին Բադասարյանի համար մեկ տարի առաջ դեռ երազանք էր, մինչդեռ մայիսի 29-ին կայացած համերգային երեկոն, որը նախաձեռնել էր Unity Production-ը, ոչ միայն իրականություն դարձրեց այն, այլև` արդարացրեց խմբի բոլոր սպասելիքները... Ծափահարություններ, ջերմություն, ծաղիկներ ու ձայնակցություն սիրված երգերի ընթացքում, ինչը Ժակլինի խոսքով` անսպասելի էր, բայց` հաճելի.

«Վերջին դեպքերից հետո, իհարկե, բոլորս ամեն ինչին այլ ձեւ ենք նայում: Նույն ցավն ենք ապրել բոլորս, բայց ես հույս ունեմ, որ Հայաստանը մի օր կդառնա անվտանգ երկիր, որտեղ կկարողանանք ապրել, ստեղծել եւ երջանիկ լինել: Մենք այսօր ուզում ենք այս դժվար պահին, այս ցավի մեջ ձեզ մի քիչ հույս տալ եւ հավատ»,-բեմից նշեց երգչուհին: «Ինձ համար շատ դժվար է, հատկապես, հիմա գալ Հայաստան, բայց կարծում եմ՝ մշակույթով ամեն-ինչ կարելի է առաջ տանել ու պահպանել»,-հավելեց նա:

Համերգի ընթացքում երգչուհին զգեստափոխվեց երկու անգամ, իսկ բեմահարթակում Ժակլինն ու խմբի մյուս երաժիշտները ոտաբոբիկ էին` կանգնած հայկական զարդանախշերով գորգերի վրա:

Երբ թվում էր, թե բոլոր անակնկալներն ավարտված են, իսկ հույզերը` փոխանցված, խումբն անսպասելի վերադարձավ բեմ, եւ Ժակլինն անակնկալ մատուցեց իր տատիկին` հատուկ նրա համար գրված երգով շնորհավորելով նրա ծննդյան օրը: Կատարման ընթացքում ոչ միայն երգչուհին, այլեւ` հանդիսատեսը չկարողացան զսպել արցունքները:

Առավել մանրամասն՝ Աղբյուրը՝ News.am Stile