Համաշխարհային մամուլի իրարամերժ արձագանքները՝ Մոսկվա-Անկարա հարաբերությունների «տաքացմանը»

Տարբեր լրատվամիջոցների կարծիքով՝ Ռուսաստանի Դաշնության և Թուրքիայի հարաբերությունները կարող են ինչպես վերականգնվել, այնպես էլ շարունակվել լինել «սառը» վիճակում: Այս մասին հայտնում է Life.ru-ն:

Արտասահմանյան ԶԼՄ-ները միակարծիք չեն Մոսկվայի և Անկարայի հարաբերությունների «տաքացման» հարցում: Այսպես, բրիտանական «Express» թերթը կարծում է, որ Ստամբուլում տեղի ունեցած ահաբեկչությունից հետո Ռուսաստանն ու Թուրքիան կմիավորվեն ընդհանուր թշնամու՝ «Իսլամական պետություն» ահաբեկչական խմբավորման դեմ պայքարելու համար:

Իսկ ահա «International business times»-ը հավաստիացնում է, որ ահաբեկիչների կողմից Ստամբուլի օդանավակայանի վրա հարձակումը միայն կդադարեցնի ռուս-թուրքական հարաբերությունների վերականգնումը և կվնասի Թուրքիայի տուրիստական ոլորտին:

«Al Jazeera»-ի՝ «Ռուսաստանը փակեց Թուրքիայի դեմ ճգնաժամային փուլը» վերնագրով նյութում նշվում է, որ թուրքական կողմը Վլադիմիր Պուտինի և  Ռեջեփ Թայիփ Էրդողանի հանդիպումը դիտարկում է «արդյունավետ և դրական»: Իսկ «Daily sabah»-ը նշում է, որ երկու նախագահների հեռախոսարզրույցը ռուսական ինքնաթիռի պատահարից հետո առաջին երկխոսությունն է եղել: