Մոսկվա է վերադարձել «օրենքով գող» Գուրամ Չիխլաձեն. նա որոնվում է արյան վրեժ լուծելու համար

Երկարատև բացակայությունից հետո ՌԴ մայրաքաղաք Մոսկվա է վերադարձել «օրենքով գող» Գուրամ Չիխլաձեն, ով հայտնի է «Կվեժոյևիչ» մականվամբ: Այս մասին գրում է Rosbalt.ru-ն` հղում տալով իրավապահ մարմինների իր աղբյուրներին:

Նշվում է, որ 2014 թվականի մայիսին ոստիկանները Մոսկվայում անհաջող գործողություն են իրականացրել նրան ձերբակալելու համար: Դրանից հետո «օրենքով գողը» լքել է երկրի սահմանները և հաստատվել Թուրքիայում: «Օրենքով գողի» նկատմամբ հայտարվել էր հետախուզում: 

Քննիչները ենթադրել են, որ նա կարող է կապ ունենալ 2014թվականի հունվարին նախկին «օրենքով գող» Դավիդ Մելկաձեի՝ «Դաթո Փոթիյսկու» գնդակահարության հետ: Դրանից հետո «Դաթո Փոթիյսկու» սպանության իրականացման համար ձերբակալվել էր երիտասարդ Բախշի Պետրոսյանը, ով  իր վրա էր վերցրել հանցագործության մեղքը, միևնույն ժամանակ, սակայն, չէր կարողացել բացատրել դրդապատճառները: Արդյունքում՝ որոշվել էր, որ Բախշի Պետրոսյանը սպանությունը միայնակ է կատարել: Նա դատապարտվել է 12 տարվա ազատազրկման: 

Վերջերս նա ժամանել է Մոսկվա:  Rosbalt-ը նշում է, որ Չիխլաձեն առաջին հերթին ձեռք է բերել «Lexus» մակնիշի զրահապատ մեքենա և մի քանի թիկնապահ: Սակայն, «օրենքով գողը» վախենում է «Դաթո Փոթիյսկու» բարեկամների կողմից վրեժից: