Էկվադորի նախագահը Մադուրոյին մեղադրել է երկրում իրավիճակի ապակայունացման փորձերի մեջ

Էկվադորի նախագահ Լենին Մորենոն հայտարարել է, որ իր նախորդը Ռաֆայել Կորեան եւ Վենեսուելայի ղեկավար Նիկոլաս Մադուրոն պատասխանատվություն են կրում Էկվադորում շարունակվող ցույցերի համար: Մորենոն այս հայտարարությունը կատարել է Գուայակիլ քաղաքի նստավայրում, փոխանցում է ՏԱՍՍ-ը:

«Այն, ինչ այս օրերին տեղի է ունենում Էկվադորում, ժողովրդական դժգոհություն չէ՝ կապված կառավարության որոշումների հետ,- հայտարարել է Մորենոն, ում խոսքը հրապարակել է El Comercio պարբերականը: - Մի՞թե համընկնում է, որ մի քանի շաբաթ առաջ [նախկին նախագահ Ռաֆայել] Կորեան, [ԱԳ նախկին նախարար Ռիկարդո] Պատինյոն եւ [նախկին քարտուղար Պաոլա] Պաբոնը Վենեսուելա էին այցելել: [Վենեսուելայի նախագահ Նիկոլաս] Մադուրոն Կորեայի հետ ակտիվացրել են ապակայունացման ծրագիրը, նրանք կանգնած են հեղաշրջման փորձի հետեւում»:

Էկվադորի նախագահը նաեւ շնորհակալություն է հայտնել ազգային ԶՈՒ-ին իր չեզոքության համար: «Բռնությունն ու քաոսը չեն հաղթանակի»,- շեշտել է նա:

Անցյալ շաբաթ Մորենոն հրաման էր ստորագրել հոկտեմբերի 3-ից դիզվառելիքի եւ բենզինի սուբսիդիաների չեղարկման մասին, որից հետո դրանց գներն աճել էին ավելի քան 120 տոկոսով: Պրոֆմիությունների ներկայացուցիչները հայտարարել էին, որ հանդես են գալիս այս որոշման դեմ եւ բողոքի ցույցեր են կազմակերպելու: Հոկտեմբերի 3-ին երկրի ամբողջ տարածքում տրանսպորտի ոլորտի աշխատողներն անժամկետ գործադուլ էին հայտարարել: Ցուցարարները սկսել էին փակել խոշոր մայրուղիները:

Մի քանի քաղաքներում ցույցերը վերափոխվել էին անկարգությունների: Մորենոն ստեղծված իրավիճակում երկրում արտակարգ դրություն էր հայտարարել՝ պատճառաբանելով «քաղաքացիների անդորրի եւ անվտանգության պաշտպանության եւ քաոս սերմանել փորձողներին վերահսկելու» անհրաժեշտությամբ: Հոկտեմբերի 4-ին Էկվադորի տրանսպորտայկին արհմիությունների առաջնորդը հայտարարել էր ամբողջ երկրում գործադուլները դադարեցնելու մասին: Մինչդեռ երկրի հնդկացիական համայնքների ներկայացուցիչները հայտարարել էին, որ ցույցերը շարունակում են: