Էկվադորում ցույցերի պատճառով ԱԴ ռեժիմ են հայտարարել

Հինգշաբթի Էկվադորի նախագահ Լենին Մորենոն երկրում արտակարգ դրության ռեժիմ է հայտարարել ցույցերի պատճառով, որոնք հարուցել էին կառավարության տնտեսական միջոցառումները, փոխանցում է ՏԱՍՍ-ը:

«Կարգը, քաղաքացիների անդորրն ու անվտանգությունը պաշտպանելու եւ քաոս սերմանել փորձողներին վերահսկելու նպատակով ես հայտարարել եմ ազգային մակարդակով արտակարգ դրության ռեժիմ»,- նշված է հայտարարության մեջ, որը հրապարակվել է պետության ղեկավարի Twitter-յան էջում:

Մորենոն հստակեցրել է, որ ԱԴ ռեժիմ մտցնելու որոշումն ընդունվել է «առավոտյան նախարարների հետ հանդիպման ժամանակ»: «Կրկնում եմ՝ մենք երկխոսության պատրաստ ենք, բայց շանտաժի չենք տվի եւ կկգործենք օրենքի համաձայն»,- ընդգծվում է հայտարարության մեջ:

Էկվադորի նախագահը երեքշաբթի հրաման էր ստորագրել դիզվառելիքի եւ բենզինի սուբսիդիաները չեղարկելու մասին, ինչը հանգեցրել էր դրանց գնաճի: Պրոֆմիությունների ներկայացուցիչները հայտարարել էին, որ այդ որոշումը չեն ընդունում եւ ցույցեր են կազմակերպելու:

El Comercio պարբերականի տեղեկություններով՝ ներկայումս Կիտոյում ընթանում են բողոքի 13 ցույցեր: Ցուցարարներն արգելափակում են փողոցները, ինչը դժվարացնում է քաղաքով տեղաշարժը: Պարբերականը նշում է, որ Էկվադորի մյուս քաղաքներում տաքսու վարորդները նույնպես փողոցները փակում են:

Էկվադորի էներգետիկայի եւ չվերականգնվող պաշարների նախարարությունը հոկտեմբերի 1-ին հայտնել էր, որ երկիրը 2020 թվականի հունվարի 1-ից ՕՊԵԿ-ից դուրս կգա: Նախարարությունից նշել են, որ որոշումը կապ ունի «ֆինանսական կայունության» հասնելու անհրաժեշտության հետ: