«ԱՄՆ-ի պատժամիջոցների հետևանքով Իրանը չի ստացել 16,8 միլիոն չափաբաժին պատվաստանյութ»․ Ռոհանի
Այսօր Իրանի Իսլամական Հանրպետության նախագահ Հասան Ռոհանին հայտարարել է, որ Իրանը համաձայնության է եկել COVAX ծրագրի միջոցով կորոնավիրուսի դեմ 16,8 միլիոն դեղաչափ պատվաստանյութի գնման վերաբերյալ, սակայն Միացյալ Նահանգների կողմից Իրանի նկատմամբ սահմանված պատժամիջոցների հետևանքով գործընթացը ձախողվել է, հայտնում է ՏԱՍՍ լրատվական գործակալությունը՝ հղում տալով Իրանի պետական հեռուստաընկերությանը։
«Եթե ամերիկյան պատժամիջոցները չլինեին, ապա COVAX ծրագրի միջոցով պատվաստանյութերը Իրանում կլինեին Իսֆանդ (ըստ իրանական օրացույցի փետրվարի 19-ից մինրև մարտի 20-ը) ամսվա ընթացքում և այսօր միլիոնավոր մարդիկ պատվաստված կլինեին», - ասել է Ռոհանին։
Ինչպես ավելի վաղ տեղեկացրել էր Tert.am-ը, հունվարին Իրանի Իսամական Հանրապետությունը հայտարարել էր COVAX ծրագրի միջոցով 16,8 միլիոն դեղաչափ պատվաստանյութ ստանալու մասին, սակայն ավելի ուշ տեղեկացրել էր, որ դրանց մատակարարումը կուշանա։
Փետրվարի 9-ին Իրանում սկսվել է կորոնավիրուսի դեմ պատվաստումների կամավոր արշավը՝ ռուսականա արտադրության «Սպուտնիկ V» պատվաստանյութով։ Մարտի 11-ին Իրան է առաքվել հնդկական Bharat Biotech ընկերության 150 հազար չափաբաժին պատվաստանյութ, իսկ իրանական արտադրության պատվաստանյութի օգտագործումը նախատեսվում է սկսել գարնան վերջից ոչ ավելի շուտ։