Կալանված հարավկորեական տանկերը Սեուլին ուղղված ապտակ էր Իրանին պատկանող 6 մլրդ դոլարը չվճարելու համար. Al Masdar News
Իրանի կողմից Հարավային Կորեայի դրոշով Hankuk Chemi տանկերի կալանումը ոչ թե ԱՄՆ-ին ուղղված սադրանք է, այլ Սեուլին ուղղված «մեսիջ», ինչի մասին ասել է իրանական ուժերին մոտ կանգնած անանուն աղբյուրը, գրում է almasdarnews.com լրատվական գործակալությունը:
Համաձայն աղբյուրի, նավի կալանման հիմնական նպատակն է ստիպել Հարավային Կորեային վճարել իրանական նավթի համար 6 միլիարդ դոլարը, որը սառեցվել էր Իրանի դեմ ամերիկյան պատժամիջոցների հետևանքով: Աղբյուրը նաև նշել է, որ Թեհրանը նման որոշում է կայացրել Սեուլի հետ երկարատև, սակայն անարդյունք բանակցություններից հետո:
«Կորեացիները երեսին ապտակ ստանալու կարիք ունեին, այն բանից հետո, երբ մեր վեճերը որևէ արդյունք չտվեցին: Այսպիսով նրան գիտակցեցին, որ նրանք չեն կարող արգելափակել Իրանի գումարն այն ժամանակ, երբ մենք հուսահատորեն փորձում ենք դեղորայք ու պատվաստանյութ գնել: Նրանք պետք է գիտակցեն, որ մեր նամակների պատասխանը չի կարող լինել «մենք ցավում ենք»», - ասել է անանուն աղբյուրը`ավելացնելով, որ երբ հարավ-կորեական կողմը բանակցություններ սկսի նավը վերադարձնելու վերաբերյալ, Իրանն անպայման հիշեցնելու է իր գումարների մասին:
Աղբյուրը նաև տեղեկացրել է, որ իրանական կողմը չի վախենում ԱՄՆ-ի հնարավոր պատասխանից` հաշվի առնելով, որայդ երկրի իշխանությունները զբաղված են ներքաղաքական խնդիրներով:
Սակայն Իրանի Իսլամական Հանրապետության պաշտոնական մեկնաբանությունը չի համապատասխանում անանուն աղբյուրի հայտնած տեղեկություններին: Ըստ Իրանի իշխանությունների հայտնած տեղեությունների, իրանական կողմը տանկերն իր նավահանգիստ է բերել, որպեսզի հետաքննի կասկածներն առ այն, որ տանկերը աղտոտում է Պարսից ծոցի ջրերը: Բացի այդ, Իրանը հերքել է ամերիկացի պաշտոնյաների մեղադրանքներն առ այն, որ Թեհրանը «գերեվարել» է նավը՝ ընդգծելով, որ միակ «գերեվարող» այստեղ Սեուլն է, որը հրաժարվում է չեղարկել իրանական վեց միլիարդ դոլարի սառեցումը:
Լրատվամիջոցը նշում է, որ պաշտոնական Թեհրանը 2020 թվականին կրկնապատկել էր ջանքերը կորեական կողմից հասանելիք գումարն ստանալու համար` նպատակ ունենալով հոգալ համաճարակի դեմ պայքարի իր ծախսերի մի մասը, սակայն երկու երկրների միջև համաձայնություն ձեռք չի բերվել: