Թուրքական սեյսմոգրաֆիական նավը լքել է Կիպրոսի ծովային ջրերը

RV Barbaros Hayreddin Pasa թուրքական սեյսմոգրաֆիական նավը լքել է Կիպրոսի Հանրապետության բացառիկ տնտեսական գոտին, որի սահմանները վիճարկում է Անկարան, հաղորդում է ՏԱՍՍ-ը՝ հղում անելով Կիպրոսի տեղեկատվական գործակալությանը:

Նավը մտել էր կղզիական պետության բացառիկ տնտեսական ջրեր թուրքական ռազմանավերի ուղեկցությամբ դեռեւս հուլիսի 30-ին: Համաձայն Թուրքիայի տարածած տեղեկատվության՝ Barbaros-ը պետք է գտնվեր կիպրական ջրերում մինչեւ հոկտեմբերի 18-ը, սակայն արդյունքում հեռացել է 10 օր շուտ: Ընդ որում՝ Թուրքիան չէր տեղեկացրել Միջերկրական ծովում նավերի կապիտաններին, որ նավը հեռանում է կայանման վայրից:

Հոկտեմբերի առաջին շաբաթվա ընթացքում Կիպրոսի բացառիկ տնտեսական գոտին լքել է Թուրքիայի եւս մեկ նավ՝ Yavuz-ը: Պաշտոնական Նիկոսիան ողջունել է այդ քայլը՝ ընդգծելով, որ այն իրենից ներկայացնում է «իրադարձությունների զարգացում դրական ուղղությամբ, որը նպաստում է բարենպաստ մթնոլորտի ստեղծմանը», իսկ Եվրահանձնաժողովում ասել են, որ թուրքական նավի դուրս գալը կղզիական պետության ջրերից ենթադրում է Կիպրոսի իրավիճակի շուրջ դեէսկալացիայի նախանշաններ:

Ինչպես ընդգծում է Կիպրական տեղեկատվական գործակալությունը, Կիպրոսի բացառիկ տնտեսական գոտում ներկայում չկան թուրքական նավեր, որոնք ունակ էին իրագործել հորատման աշխատանքներ: Միեւնույն ժամանակ այդ քայլով Թուրքիան «կանաչ լույս է տվել» Վարոշայի հյուսիսային թաղամասեր այցելելու համար, որտեղից 1974 թվականին վտարվել էին հույն-կիպրացիները եւ որը, հայտնվելով ՄԱԿ-ի բուֆերային գոտում, այդ օրվանից ի վեր դադարկվել եւ վերածվել էր ուրվական քաղաքի: Հինգշաբթի Վարոշա է այցելել 46 զբոսաշրջիկ, որպեսզի տեսնեն փողոցները, որտեղ կես դարով կանգնել էր ժամանակը:

Թուրքիան, որը չի ճանաչում Կիպրոսի Հանրապետությունը 1963 թվականից, վիճարկում է դրա բացառիկ տնտեսական գոտու սահմանները եւ հայտարարում, որ թույլ չի տա երկրաբանական հետախուզական հորատման աշխատանքների անցկացումն առանց թուրք-կիպրական համայնքի համաձայնության: Անկարայի վարկածով՝ Թուրքիայի՝ ռազմական նավերով ուղեկցվող հորատման նավերը գտնվում են գազի հանքավայրում արտոնագրի հիման վրա, որը տրամադրվել է Հյուսիսային Կիպրոսի թուրքական հանրապետության կողմից՝ ինքնահռչակ պետություն, որը պաշտոնապես ճանաչում է միայն Անկարան: Ընդ որում՝ գազի հանքավայրը տեղակայված է Կիպրոսից հարավ, այսինքն՝ հեռու է թուրքական համայնքի բնակության վայրից: