Հայաստանն մտնում է թուրքական ազդեցության գոտի. Գնդակը հայ ժողովրդի դաշտում է. քաղաքագետ

Ռուսաստանի վիճակը հիմա չափազանց լուրջ է եւ նրանք ամեն ինչ կանեն Թուրքիայի հետ առճակատումից խուսափելու համար: Այս մասին NEWS.am-ի հետ զրույցում նշեց քաղաքագետ Ստեփան Դանիելյանը:

«Ամենավտանգավոր կետը հենց Հարավային Կովկասն է, Հայաստանը, Արցախը: Կան երկրներ, որոնք շահագրգռված են, որ լինի կոնֆլիկտ, առաջին հերթին Իսրայելն ու Մեծ Բրիտանիան:

Պատահական չէ, որ Ալիեւը հայտարարություն տարածեց, որ Հայաստանի վարչապետը արդեն պետք է իր խոստումները թղթին հանձնի: Հիմա Հայաստան վարչապետը պետք է որոշի՝ այդ ամեն ինչը զիջում է, Սյունիքը եւս, եւ ինքը մտնում է թուրք-ադրբեջանական կոալիցիայի մեջ»,-ընդգծեց քաղաքագետը:

Նրա խոսքով, Հայաստանն այդկերպ մտնում է թուրքական ազդեցության գոտի, եւ սա գործող կառավարության քաղաքականությունն է:

Անդրադառնալով Արցախի ճակատագրին, նա նշեց. «Արցախի հետ լինելու է կամ այն, ինչը ցանկանում են Թուրքիան ու Ադրբեջանը, կամ Հայաստանի ղեկավարությունը պետք է կուրսը փոխի կամ ղեկավարությունը փոխվի: Այստեղ գնդակն արդեն հայ ժողովրդի դաշտում է եւ ընդդիմադիրների դաշտումէ:

Նոյեմբերի 9-ի հայտարարությունը, ըստ էության, ռուս-թուրքական հայտարարություն էր: Ես վստահ եմ, որ Նիկոլ Փաշինյանի իշխանությունը Հայաստանում պայմանավորված է այդ ռուս-թուրքական կոմպրոմիսով, որովհետեւ երկու կողմն էլ չէին ցանկանում իրավիճակը լարել, եւ դրա երաշխավորը Փաշինյանն է: Հիմա եթե ռուս-թուրքական հարաբերությունները լարվեն, ապա այստեղ Փաշինյանի իշխանության արտաքին լեգիտիմությունը վերանում է:

Եթե ռուս-թուրքական վիճակը սրվում է եւ Փաշինյանը մնում է իշխանության, մենք արդեն թուրքական ազդեցության գոտի ենք: Եթե Փաշինյանը փոխվում է, ապա այստեղ արդեն վիճարկվում է թուրքական ազդեցության գոտի լինելը»: