Լեռնային Ղարաբաղի հիմնախնդրով սուբստանտիվ բանակցություններ դեռեւս չկան. քաղաքագետ
Սլովակիայում Հայաստանի եւ Ադրբեջանի ԱԳ նախարարների հանդիպումը եւս մեկ անգամ ցույց տվեց, որ ղարաբաղյան հակամարտության կարգավորման գործընթացում ստագնացիա կա, սուբստանտիվ բանակցություններ չկան: Այս մասին դեկտեմբերի 26-ին լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Քաղաքագետը հիշեցրեց, որ այսպիսի բանակցություններ վերջին անգամ ընթացել են 2011 թվականին Կազանում, իսկ մնացյալ բոլոր հանդիպումները եւ գործընթացները կարելի է որակել հակամարտության ոչ թե լուծում, այլ կառավարում, որում հաջողություններ են գրանցվել: «Դրանց են դասվում շփման գծում զոհերի թվի զգալի կրճատումը, լրագրողների այցերը, ինչն աննախադեպ էր»,- նշեց նա:
Փորձագետի գնահատմամբ՝ 2020 թվականին կշարունակվի հակամարտության կառավարման միտումը, եւ դրա համար կողմերի համապատասխան կամք կա:
Անդրադառնալով Ադրբեջանի նախագահի հայտարարությանն այն մասին, որ մոտ ժամանակում հակամարտությունը լուծվելու է, Իսկանդարյանն ասաց. «Սա եւս նորություն չէ եւ հնչում է արդեն մի քանի տասնյակ տարի, իսկ այսօր այդպիսի հայտարարություններն առանձնապես արդիական են երկրում վերնախավի սպասվող փոփոխության ֆոնին: Հռետորաբանության առումով Բաքուն մշտապես աշխատում է արտաքին, ներքին եւ հայկական լսարանի ուղղությամբ: Բայց պատերազմ սկսելու համար անհրաժեշտ են ոչ թե հայտարարություններ, այլ միանգամայն այլ գործողություններ, որոնք առայժմ չկան: Բաքվի կողմից միաժամանակ «զենք շաչելն» ու բանակցություններ վարելը կշարունակվի նվազագույն եւս 10 տարի»:
Քաղաքագետի կարծիքով՝ կտրուկ փոփոխությունների համար անհրաժեշտ է ստատուս քվոյի փոփոխություն, այսինքն՝ հավասարակշռության խախտում: «Հակամարտության լուծման տարբերակները ընդամենը երեքն են, որոնք բոլորն էլ բանակցությունների սեղանին են, այնպես որ՝ այս պահին անհնար է որեւէ նոր բան առաջարկել: Ամեն դեպքում, լուծումը պետք է գտնեն իրենք՝ հայերն ու ադրբեջանցիները, եւ նրանցից ոչ մեկը դա չի անի»,- ամփոփեց Ալեքսանդր Իսկանդարյանը: