Վազգեն Մանուկյանը ՀԽ-ն վերածել է քաղաքական հարթակի. նա Քոչարյանի հետ նույն դաշտում է (Տեսանյութ)

Հանրային խորհրդի անդամներ Բաբկեն Պիպոյանը և Կարեն Զադոյանը հանդես են եկել Հանրային խորհրդում իրենց անդամությունը դադարեցնելու վերաբերյալ հայտարարությամբ։

Խնդրում եմ նշեք՝ ի՞նչ է կատարվում Հանրային խորհրդում․ «Առաջին լրատվական»-ի հարցին Հանրային խորհրդի անդամ Ստյոպա Սաֆարյանը պատասխանեց․ «Ինձ թվում է, որ Հանրային խորհրդում վաղուց է բան կատարվում։ Մինչև հեղափոխություն ոչինչ չէր կատարվում, իսկ հեղափոխությունից հետո ինչ-որ բան է կատարվում։ Կատարվում է այն պարզ պատճառով, որ նոր նշանակված անդամները բավականին ժամանակ է՝ չեն հասկանում, թե ինչ է կատարվում․ ի վերջո ինչո՞վ ենք զբաղվելու, և ո՞րն է մեր առաքելությունը։ Հին անդամներից շատերը համոզված են, որ իրենք փայլուն են աշխատել ու իրենք շատ պետքական մարմին են։ Թեպետ, հանուն արդարության, երեկվա նիստում զարմացա, որ ոմանք իրենց տեսնում են որպես քաղաքական ընդդիմախոս կառավարությանը։ Այն դեպքում, երբ օրենքում նշվում է, որ Հանրային խորհուրդը խորհրդատվական մարմին է։ Ոմանք նույնիսկ իրենց տեսնում են որպես գործադիրի վերահսկողական մարմին։ Դա այդպես չէ։ Հանրային խորհուրդը մի կառույց է, որը պետք է անկախ հասարակական փորձաքննություն անցկացնի և այդ փորձաքննության արդյունքների հիման վրա պետք է օգնի կառավարությանը՝ բալանսի բերենք հասարակական ամենատարբեր շահերը։ Այս ամենը ես երեկվա նիստի ժամանակ էլ եմ ասել»։

Իսկ Հանրային խորհրդի անդամ Անահիտ Բախշյանն էլ ասաց․ «Յուրաքանչյուր նոր ձևավորված կառավարություն ինքը իր Հանրային խորհուրդն է ստեղծում։ Այսինքն՝ ընտրություններ եղան՝ ձևավորվեց նոր կառավարություն, նախկին Հանրային խորհուրդն իր լիազորությունները դադարեցնում է, և նոր կառավարությունն իր Հանրային խորհուրդն է ստեղծում։ Յուրաքանչյուր Հանրային խորհուրդ պետք է ծառայի այն կառավարությանը, որը ստեղծել է այդ Հանրային խորհուրդը։ Այս Հանրային խորհուրդը վերջնականորեն ձևավորվել է ապրիլին, և ապրիլից հետո մենք ինչքան հանդիպել ենք, չենք կարողացել եզրեր գտնել»։

Նյութի սկզբնաղբյուրը՝ 1in.am