Ընթացիկ տարվա 6 ամսում Երևանի կենդանաբանական այգում կենդանիների գլխաքանակն աճել է (լուսանկարներ)
Հիմա Երեւանի կենդանաբանական այգում կա կենդանիների 128 տեսակ՝ գիշատիչներ, սողուններ, ձկներ, թռչուններ եւ շատ այլ կենդանիներ. ընդհանուր 705 գլուխ կենդանի: Վերջին կես տարում այգում դրանց քանակն ավելացել է 183 գլխով: Այս մասին News.am լրատվականին հետ զրույցում ասաց Երեւանի կենդանաբանական այգու աշխատակազմի աշխատակից Շահանե Բաղդասարյանը:
Կենդանաբանական այգում յուրաքանչյուր կենդանի ապրում է իր տարածքում, որը հարմարեցված է նրա տեսակային յուրահատկություններին: Այստեղ կենդանիներին կերակրում եւ մեծացնում են հատուկ մշակված ծրագրով: Կենդանաբանական այգում կան բոլոր անհրաժեշտ կերերը, իսկ կերակրելու ռեժիմը յուրաքանչյուր տեսակի համար անհատական է կազմված: Այցելուները նույնպես կարող են կերակրել այգու բնակիչներին, բայց միայն հատուկ կերով, որը վաճառվում է այգում:
Երեւանի կենդանաբանական այգում սանիտարա-հիգիենիկ միջոցառումներն անցկացվում են ամեն օր: Ամռանը մեխանիկական մաքրումը կատարվում է օրական մի քանի անգամ, իսկ ախտահանում է կատարվում ամեն ամիս:
«Հայաստանի կլիման թույլ է տալիս հարմար պայմաններ ստեղծել ինչպես հարավային, այնպես էլ հյուսիսային կենդանիների համար: Կենդանիներն էլ, օրինակ՝ ամուրյան վագրերը, կարող են հարմարվել այն պայմաններին, որտեղ ապրում են», - ասաց Բաղդասարյանը:
Յուրաքանչյուրը կարող է օգնել բարելավել կենդանիների կյանքի պայմանները: Դրա համար Երեւանի կենդանաբանական այգում գոյություն ունի հատուկ ծրագիր:
Օրինակ՝ ծրագրի շրջանակում բարեկարգվել է վագրերի համար տարածքը՝ բոլոր հարմարություններով՝ ջրվեժով, ծառերով, շոգից թաքնվելու համար հատուկ մեծ քարերով:
Ցանկացած մարդ կարող է իր ներդրումն ունենալ կենդանաբանական այգու զարգացման գործում եւ դառնալ կենդանիներից մեկի խնամակալը:
Խնամակալությկունը ձեւակերպվում է մեկ տարով, իսկ մարդուն հատուկ նշան-անցագիր է տրվում կենդանուն այցելելու համար, ինչպես նաեւ այդ նշանը խնամակալին հնարավորություն է տալիս մասնակցել հատուկ միջոցառումներին: