Նազարբաեւի թոռը թմրանյութի ազդեցության տակ հարվածել եւ կծել է ոստիկանին, որը խանգարել է նրան ինքնասպան լինել

Լոնդոնի Սազարկ շրջանի դատարանում տեղի են ունեցել Ղազախստանի նախկին նախագահ Նուրսուլթան Նազարբաեւի թոռան՝ Այսուլթան Նազարբաեւի գործով լսումները; նա մեղադրվում է ոստիկանի վրա հարձակման մեջ: Թմրանյութի ազդեցության տակ Այսուլթանը հարվածել եւ կծել է ոստիկանին:

Այսուլթանը Նուրսուլթան Նազարբաեւի ավագ դստեր՝ Դարիգա Նազարբաեւայի որդին է: Նա ավարտել է Սանդհերսիտ թագավորական ռազմական ակադեմիան, հաղորդում է BBC-ը:

Նախնական լսումները սկսվել են հուլիսի 4-ին: Դրանք ընթանում են մամուլի համար բաց ռեժիմով: Մեղադրյալը դեռեւս կալանքի տակ կմնա, իր մեղքը նա չի ընդունում:

Մեղադրող Գրեգոր Մաքքինլին պատմում է, որ Այսուլթանը հունիսի 3-ին «դեբոշ» է սարքել Լոնդոնի կենտրոնում հյուրանոցներից մեկում, դուրս է եկել պատշգամբ, սպառնացել ցած նետվել եւ բղավել, որ ինքնասպան կլինի:

Հունիսի 5-ին նույնը կրկնել է իր բնակարանում, եւ այդ ժամանակ հարեւանները ոստիկանություն են կանչել: Մաքքինլիի խոսքով՝ Այսուլթանն իրեն ագրեսիվ է պահել, կրկին սպառնացել ինքնասպան լինել՝ հարձակվելով ոստիկանի վրա եւ կծելով նրան: Ոստիկանը էլեկտրոշոկեր է կիրառել:

Այդպիսով, Այսուլթանը մեղադրվում է մարդուն վնաս հասցնելու եւ գույքը վնասելու մեջ:

Մեղադրող կողմն ասում է, որ տղան նաեւ կոկաին է օգտագործել, եւ դա է եղել ագրեսիվ պահվածքի պատճառը: Նրա անձնագիրն առգրավվել են: Մաքքինլիի խոսքով՝ նրա հարուստ ընտանիքը կարող է օգնել նրան ստանալ դիվանագիտական անձնագիր եւ լքել Մեծ Բրիտանիան ու խուսափել պատասխանատվությունից:

Փաստաբանն առաջարկել է 90 հազար ֆունտ սթերլինգով գրավի դիմաց ազատել նրան եւ տնային կալանք սահմանել:

Դատավորն ասել է, որ պատրաստ է գրավի դիմաց ազատ արձակել Այսուլթանին, սակայն պայմանով, որ նա վերականգնողական կլինիկա կտեղափոխվի, ցանկալի է Priory՝ թմրանյութից կախվածություն ունեցողների կլինիկա, որտեղ կուրսեր են անցել երաժիշտներ Էմմի Ուայնհաուզը, Ռոբբի Ուիլյամսը, ֆուտբոլիստ Ջորջ Բեսթն ու դերասան Ջոննի Դեփը:

Այժմ Այսուլթանի շրջապատի խնդիրն է կլինիկային համոզել գնահատել նրա վիճակը, այլապես՝ նա կմնա կալանքի տակ: