Հայաստանի իշխանությունները խեղաթյուրում են Սահմանադրության իմաստը. իրավաբան

Սահմանադրության իմաստը խեղաթյուրված է այն բանով, որ իշխանությունները երկրի հիմնական փաստաթուղթն օգտագործում են իրենց գործողությունները հիմնավորելու համար: Իրավաբանական գիտությունների թեկնածու, դոցենտ Արթուր Ղազինյանն այս մասին ասաց «Հայաստանի Սահմանադրությունը. կարմիր եւ կանաչ գծեր» համաժողովի ժամանակ, որը կազմակերպել է «Իրավական ճանապարհ» հասարակական կազմակերպությունը։ Հիշեցնենք, որ հուլիսի 5-ին Հայաստանում նշվում է Սահմանադրության օրը։

Նա որպես օրինակ բերեց ընդունումը, լրացումները եւ այն, թե ինչպես է Սահմանադրությունը կիրառվել ընտրությունների գործում: Նրա խոսքով՝ սա խոսում է այն մասին, որ յուրաքանչյուր իշխանություն փորձել է Սահմանադրությանը ստիպել ծառայել իր շահերին, ինչը Սահմանադրության հանդեպ անվստահություն է առաջացնում: Քաղաքակիրթ երկրների ղեկավարությունը մշտապես հղում է կատարում Սահմանադրությանը, հիշեցրեց փորձագետը: «Հայաստանում առավել հաճախ մատնանշվում է ժողովրդի գործոնը, իսկ Սահմանադրությունը երկրորդ պլան է մղվում, եւ տպավորություն է ստեղծվում, որ ժողովուրդն ավելի կարեւոր է, իսկ Սահմանադրությունը սկսում է դիտարկվել որպես խանգարող տարր»,- նշեց փորձագետը: Արդյունքում տեղի է ունենում փոխակերպում, իսկ իշխանությունների ցանկությունները ներկայացվում են որպես ժողովրդի ցանկություն:

«Առաջ է քաշվում նպատակ, եւ այդ նպատակը հռչակվում է որպես ժողովրդի պահանջ»,- նշեց Ղազինյանը՝ հավելելով, որ չի հիշում դեպք, երբ հրապարակային ելույթներում եւ կոչերում հղում կատարվեր Սահմանադրությանը: Իրավաբանը ցավով ընդունեց, որ Սահմանդրության օրը իր նշանակությամբ զիջել է նորահայտ Քաղաքացու օրվա տոնին:

Խոսելով իշխանության թեւերի տարանջատման մասին՝ իրավաբանը նշեց, որ օրենսդրության տրամաբանությամբ խորհրդարանը պետք է կառավարություն ձեւավորի: «Գործով տեղի է ունենում հակառակը՝ մեկ մարդը ձեւավորում է թե՛ մեկը, թե՛ մյուսը, եւ հիմա ուզում է նաեւ սեփական ցանկությամբ դատական իշխանությունը ձեւավորել: Սա կառավարման խորհրդարանական համակարգ չէ»,- հայտարարեց Ղազինյանը՝ հավելելով, որ Հայաստանում գոյություն ունեցող համակարգը գրավիչ է անգամ Կիմ Չեն Ընի համար:

«Մեկ մարդու կամքը նույնացվում է ժողովրդի կամքին, դառնում բացարձակ չափանիշ եւ ենթակա է անշեղ կատարման»,- արձանագրեց Ղազինյանը:

Նրա խոսքով՝ պետության ղեկավարի գործառույթն է միայն հետեւելը, իսկ ահա վետոյի իրավունք չկա: Ինչպես նաեւ չկա իշխանության հավասարակշռում:

Փորձագետի կարծիքով՝ Վահե Գրիգորյանի հայտարարության առաջացրած վեճերը այն առնչությամբ, թե ՍԴ անդամներն արդյոք դատավորներ են, բացարաձակապես քաղաքական երեւույթ է եւ իրավաբանական գնահատականի ենթակա չէ: