Երգչուհի Լեոնորան հերթական հաղթանակն է պարգևել Հայաստանին (լուսանկարներ)
Իսպանիայում կայացած միջազգային մրցույթում Հայաստանի դրոշի ներքո ելույթ ունեցած գյումրեցի երգչուհի Լեոնորան կրկին հաղթանակով է վերադարձել: Միջազգային մրցույթներում Լեոնորայի համար հաղթանակներ գրանցելը կարծես ավանդույթ է դարձել: Մրցույթի ընթացքի և այլ մանրամասների մասին Operativ.am-ի թղթակիցը զրուցել է երգչուհու հետ:
-Լեոնորա, ե՞րբ, որտե՞ղ է կայացել միջազգայյին մրցույթը և ինչպե՞ս եք իմացել մրցույթի մասին:
-Մարտի 20-24-ը՝ Բարսելոնայի Լորետ Դե Մար քաղաքում տեղի ունեցավ «GOLDEN VOICES OF MONTSERRAT» միջազգային մրցույթը: Մրցույթում ես ներկայացրել եմ «Կատարողական արվեստի համաշխարհային ասոցիացիա»-ն, որի ղեկավարի՝ Արման Ղուկասյանի առաջարկով էի մասնակցեցի մրցույթին:
-Թվով քանի՞ երկիր է մասնակցել մրցույթին և ո՞ր երկրները:
-Մրցույթին մասնակցել է 11 երկիր, որը ներկայացրել էր շուրջ 200 մասնակից: Եզրափակչում պայքարում էի Հարավային Աֆրիկայի, Բելառուսի, Վրաստանի, Ռուսաստանի, Եգիպտոսի, Ինդոնեզիայի, Իսպանիայի, Ուզբեկիստանի, Կուբայի, և Իսրայելի ներկայացուցիչների հետ: Նրանք բոլորը մրցակից մասնակիցներ էին:
-Ի՞նչ եք կատարել և ո՞ր անվանակարգերում եք ներկայացել ժյուրիին:
-Ներկայացել եմ 2 անվանակարգում. դասական և հոգևոր երգեցողություն: Կատարել եմ Բախի «Bist du bei mir»-ը, Գրիգոր Նարեկացու «Հավուն -Հավուն» և Կոմիտասի՝ «Կռունկ» երգերը: Նշեմ, որ հայերեն կատարումներս եղել են ակապելա:
-Ի՞նչ ծրագրեր ունեք, առաջիկայում Ձեր լսարանն ի՞նչ կարող է ակնկալել:
-Միջազգային մեծ մրցույթների մասնակցելու առաջարկներ եմ աստացել և հիմա պատրաստվում եմ հերթական մասնակցությանս: Հրավերները ստացել ենք Ուկրաինայում, Իտալիայում, Խորվաթիայում կայանալիք մրցույթներին մասնակցելու համար:
-Լեոնորա, միջազգային մրցույթներին մասնակցելու բազմակի փորձ ունեք, ինչո՞վ էր առանձնահատուկ Ձեզ համար այս մրցույթը:
Այս մրցույթն, ինչպես մյուսները, ևս ուներ բարդ և հաճելի մրցակցություն՝ հագեցած լարված և հաճելի պահերով: Բայց միայն մեկ բան դարձավ ինձ համար ավելի կարևոր, հիշարժան, անմոռանալի և ինչու չէ նաև ցնծալի: Այն, որ ես առաջինն էի, ով նրանց համար պատմական մեծ նշանակություն ունեցող մշակութային բարձր արժեք ունեցող Մոնսերատ եկեղեցում հնչեցրեց Նարեկացի և Կոմիտաս՝ իրար կապելով տարբեր ազգերի մշակույթները, այդպիսով՝ նրանց հաղորդակիցը դարձնելով հայկական անզուգական մեղեդիներին: Առավել հպարտ զգացի, երբ տեսա հանդիսատեսի հիացական հայացքները և ջերմ ընդունելությունը: Այսինքն՝ իմ մշակույթի գանձերն իրենց փայլքն ու արտացոլանքը թողեցին եվրոպացիների սրտերում և հիշողություններում: Իսկ ես, երբ իմացա, որ հաղթանակը նորից մերն է՝ քանի որ զբաղեցրել եմ 1-ին հորիզոնականը, ինձ հետ հայրենիք բերեցի ջերմ խոսքեր, մաղթանքներ, դրական լիցքեր, որոնք կստիպեն ինձ աշխատել և ստեղծագործել նորովի:
Operativ.am-ը շնորհավորոմ է երգչուհուն և մաղթում նոր հաղթանակներ:
Ավելի վաղ հայտնել էինք, որ երգչուհին ու նրա ընտանիքը մրցույթից վերադառնալիս հրաշքով էին փրկվել Թբիլիսիում ինքնաթիռի վթարային վայրէջքի պատճառով: