Բնակչությունն այնքան վախեցած է, որ ամեն մի տարօրինակ նախանշանի համար դիմում է բժշկի
Հայոց աշխարհ թերթը գրում է, թե Մարտունու տարածաշրջանում գրանցվել է սիբիրախտով հիվանդացության եւս մեկ կասկածելի դեպք: Հիվանդը հոսպիտալացված է, նրա վիճակը բժիշկները գնահատել են բավարար:
Սիբիրյան խոցին բնորոշ ախտանշաններով կասկածելի բոլոր դեպքերը' բացառությամբ վերջինի, արդեն բուժվել են: Բակային համայցերի ընթացքում արձանագրված կասկածելի 55 դեպքից 10-ը լաբորատոր հետազոտությունների արդյունքում հաստատվել է: Կեղծ նախանշաններ չեն եղել, քանի որ սիբիրյան խոցի վերքը տարբերվում է: Բացի դրանից' բնակչությունն այնքան իրազեկված ու վախեցած է, որ ամեն մի տարօրինակ նախանշանի համար դիմում է բժշկի:
Սննդամթերքի անվտանգության պետական տեսչության մամուլի քարտուղար Բաբկեն Պիպոյանը նշեց, որ կենդանիների սիբիրախտի նոր դեպքեր չեն գրանցվել, ինչի շնորհիվ մսամթերքի վաճառակետերից արդեն հանվել է վերահսկողությունը: Հիվանդության պատճառով շուրջ 2 ամիս մսամթերքի վաճառակետերը վերահսկողության տակ էին: