Թշնամանքը հասարակությունից տեղափոխվեց մամուլ, մամուլից էլ ետ գնաց՝ խորացնելու թշնամանքի գործընթացը հասարակության մեջ. այդ շրջադարձը եղել է այս 3 տարիների ընթացքում. Հակոբ Ավետիքյան
Այս իշխանությունը 3 տարիների ընթացքում վատթարացրել է ԶԼՄ-ների վիճակը և փոփոխությունները եղել են դեպի վատը, ես կզարմանայի, եթե գտնվեր որևէ լրագրող և այդ համայնքի ներկայացուցիչ, որը կփաստեր հակառակը, մամուլի բևեռացումը անհամեմատ խորացել է, հասարակության շրջանում մամուլի նկատմամբ դրական վերաբերմունքը իջել է նվազագույնի: Այս մասին Tert.am-ի հետ զրույցում ասել է «Ազգ» թերթի խմբագիր Հակոբ Ավետիքյանը՝ անդրադառնալով մամուլի ազատության միջազգային օրվան և Հայաստանյան մամուլի կարգավիճակին գործող իշխանության օրոք:
«Մամուլի գլխավոր խնդիրներից մեկն է տարբեր խավերի, շերտերի միջև իրար հասկանալու հարթակ դառնալ, և մեդիա կամ մամուլ ասելով՝ ես հասկանում եմ դա, բայց այս պահին մամուլը այդ հարթակը չէ, որտեղ տարբեր զանգվածների ներկայացուցիչներ կարող են իրար հասկանալ, դարձել է թշնամանք տածելու հարթակ»,- ասաց Հակոբ Ավետիքյանը:
Նա նաև նշել է՝ տարիներ առաջ «Հայկական ժամանակ» թերթից վատ մշակույթ է ներթափանցել հայկական մամուլ, դա հետզհետե սկսել է տարածում ունենալ այլ ԶԼՄ-ների վրա: «Այդ թերթը շատ մեծ վնասներ է հասցրել հայկական մամուլին, նրա միջոցով էլ ստեղծվել են թշնամական վերաբերմունք, տգեղ, ոչ գրական և ոչ մամուլին հարիր նյութեր, հոդվածներ, ի հայտ եկավ լռությունը վաճառելու, շանտաժի մշակույթը: Լրագրողներից շատերը երբեմն չեն էլ զգում թույլատրելի սահմանը»,- նշեց նա:
Ավետիքյանը ընդգծել է՝ մամուլը իր պատկերացրած ձևաչափով ազատ չէ և դա վերաբերում է թե՛ իշխանական, թե՛ ընդդիմադիր թևին: Ըստ նրա՝ դիտարկելով հայաստանյան ներքաղաքական իրավիճակը՝ հարկավոր է նշել, որ այս պայմաններում մամուլի ազատության մասին խոսելն ավելորդ է:
«Եթե փորձենք իշխանական կամ ընդդիմադիր դաշտում այլ կարծիք արտահայտել, որը այդ լրատվամիջոցի քիմքին հաճո չէ, կա՛մ չեք գտնի ձեր տեղը, կա՛մ կփորձեն ցույց տալ՝ որքան են բոլոր կարծիքները հարգում, այսինքն՝ ցուցադրական երևույթի կվերածվի իրավիճակը: Իշխանական լրատվամիջոցները, որոնք գոյատևում են իշխանական միջոցներով, չափազանց շատ կանխակալ կարծիք և վերաբերմունք ունեն այն մարդկանց նկատմամբ, որոնք Փաշինյանին որևէ կերպ չեն գովերգում, այլ հակառակը՝ քննադատում են, այդ լրատվամիջոցների համար տեղ չկա: Թշնամանքը հասարակությունից տեղափոխվեց մամուլ, մամուլից էլ ետ գնաց՝ խորացնելու գործընթացը հասարակության մեջ»,- ընդգծել է Ավետիքյանը:
Նա իր խոսքում անդրադարձ է կատարել արտակարգ և ռազմական դրության պայմաններում լրատվամիջոցների խոսքի սահմանափակմանը և նշեց՝ ռազմական և արտակարգ դրության պայմաններում ԶԼՄ-ների գլխին մտրակ էր կախված և այդպիսի դրություն հաստատելը և պահպանելը նշանակում է, որ մի օր այդ մտրակը կարող է իջնել լրագրողների գլխին:
«Կա հստակ մի բան՝ այսօրվա բոլոր անօրինականությունները, որոնք տեղի են ունենում, կարող են կատարվել օրենքի անվան տակ: Հնարավոր է ռեպրեսիվ գործողություններ լինեն, եթե այսպես մնա և չազատվենք գործող իշխանությունից, ես տեսնում եմ՝ մոտ ապագայում ռեպրեսիվ գործողություններ են լինելու, մամուլի ու առհասարակ բոլոր կարգի ազատությունների նկատմամբ»,- նշել է նա:
Հակոբ Ավետիքյանը անդրադարձ է կատարել նաև վերջին շրջանում քննարկվող օրինագծերին, որոնք շրջանառության մեջ են դրվել գործող իշխանության կողմից, և նշեց՝ 4-րդ իշխանությունը այժմ գտնվում է խղճուկ վիճակում:
«Վերջին ժամանակաշրջանում նաև մի շարք օրենքի նախագծեր են եկել դաշտ, և պետք է նշեմ՝ նրանք ինքնապաշտպանական բնույթ ունեն այն մարդկանց նկատմամբ, ովքեր սանձարձակ կերպով օրենքը ոտնահարում են ամեն ձևով ու միջոցներով, իսկ այս տուգանքի չափերի բարձրացումը ստիպում է լրագրողներին սահմանափակել խոսքի ազատությունը, լրատվամիջոցները ազատորեն չեն արտահայտելու իրենց կարծիքը և այդ օրենքի նախագծերը տանելու են մամուլի սնանկացմանը»,- ասաել է Հակոբ Ավետիքյանը: