Գազի «բալոնչիկը» երեխան գնել է Բարեկամության մետրոյի անցումից․ նոր մանրամասներ

Երեկ՝ հոկտեմբերի 1-ին, SHAMSHYAN.com-ը լուր էր հրապարակել Երևանի Նիկոլ Աղբալյանի անվան թիվ 19 հիմնական դպրոցում տեղի ունեցած արտակարգ դեպքի մասին, երբ դպրոցի 7-րդ դասարանի աշակերտը դասասենյակներից մեկում «բալոնչիկից» հազ առաջացնող հատուկ նյութ էր բաց թողել։

Ինչպես հայտնում է ֆոտոլրագրող Գագիկ Շամշյանը, երեկ տաք հետքերով ոստիկանության Կենտրոնական բաժնի անչափահասների գործերով և ընտանիքում բռնության կանխարգելման բաժանմունքի ծառայողները՝ բաժնի պետ Երվանդ Նիկոյանի, ԱԳ և ԸԲԿ բաժանմունքի պետ Արտակ Թազայանի և բաժանմունքի ավագ տեսուչ Լյուդվիգ Գևորգյանի գլխավորությամբ, հայտնաբերել են, թե որտեղից է աշակերտը գնել «բալոնչիկը»։

Պարզվել է, որ դա արցունքաբեր գազի բալոն է, որը մեկ օր առաջ՝ երեկոյան, դպրոցի սանը գնել է Բարեկամության մետրոյի անցումի տակ գտնվող ԱՁ-ներից մեկից, որտեղ երեխային են «բալոնչիկը» վաճառել, իսկ վաճառողին, ով Նարեկ Պ-ն է, ոստիկանները հայտնաբերել են ու պարզվել է, որ նրա մոտ շատ վատ բնավորություն է ձևավորվել, անչափահասներին նա վաճառում է անգամ դանակ, կռփազենք, գազի «բալոնչիկներ», շատ դեպքերում էլ, ըստ օպերատիվ տեղեկությունների, առանց ՀԴՄ-ի։

Եթե Կենտրոնի ոստիկանները՝ բաժնի պետի և անչափահասների գործերով բաժանմունքի պետի գլխավորությամբ հայտնաբերեցին վաճառողին, ապա այստեղ իր անելիքը պետք է ունենա նաև ՊԵԿ-ը, որը պետք է պարզի, թե ինչու է նշված ԱՁ-ն առանց ՀԴՄ-ի վաճառք իրականացնում և ինչու նաև անչափահասների։

Ֆոտոլրագրողի տեղեկություններով՝ երեկվա միջադեպից ժամեր անց մոտ 7-ից ավելի երեխաներ, իրենց ծնողների ուղեկցությամբ, տեղափոխվել են հիվանդանոցներ, քանի որ նրանց ինքնազգացողությունը տանը վատացել է։

Ինչպես ավելի վաղ հայտնել էր SHAMSHYAN.com-ը, հոկտեմբերի 1-ին, արտակարգ դեպք էր տեղի ունեցել Երևանում: Նիկոլ Աղբալյանի անվան թիվ 19 հիմնական դպրոցի 7-րդ դասարանի աշակերտը դասասենյակներից մեկում «բալոնչիկից» հազ առաջացնող հատուկ նյութ էր բաց թողել:

Դպրոցի տարածքում իրականացվել էին օդի կոնցենտրացիայի չափումներ՝ օդի մեջ վտանգավոր նյութեր չէին հայտնաբերվել, որի վերաբերյալ տեղեկացվել էր դպրոցի տնօրինությանը։

Մանրամասները՝ սկզբնաղբյուրում։