Սորոսի գրասենյակի գումարների ծագումնաբանությունը թշնամական ճամբարից են. Տիգրան Աթանեսյան

Հայաստանում գործում է օտարերկրյա գործակալական ցանց, որի նպատակն է՝ քանդել մեր պետությունը, հասցնել այն ազգային աղետի։ Այս մասին այսօր՝ հունիսի 15-ին, հրավիրված ասուլիսում հայտարարեց փաստաբան Տիգրան Աթանեսյանը՝ նկատի ունենալով «Բաց հասարակության հիմնադրամներ Հայաստան» գրասենյակի գործունեությանը։

«Քանի որ գումարները բացարձակ անհասկանալի են եւ մութ տեղից, դատելով այդ ցանցի գործունեության արդյունքներից, իրավունք ունենք հիմնավոր կերպով կասկածելու, որ այդ գումարների ծագումնաբանությունը թշնամական ճամբարից են. դրանք կարող են լինել եւ թուրքական, եւ ադրբեջանական գումարներ։ Ավելի հայատյաց, ուրիշի կարծիքը չհանդուրժող, իմ համոզմամբ, իրենց էությամբ հանցավոր ցանց դժվար է պատկերացնել։ Այդ ցանցն ունի թույլ տեղեր, ես չեմ կարծում, որ այնտեղ կան գաղափարական կողմնակիցներ, դրանք բոլորը փողի մարդիկ են, կարելի է ուշադրություն չդարձնել եթե այդ փողի դիմաց իրենք կամա թե ակամա չքանդեն մեր պետականությունը»,- ասաց Տիգրան Աթանեսյանը։

Աթանեսյանը հայցադիմում է ներկայացրել դատարան այն պահանջով, որ Հայաստանում գործող գրասենյակի գործունեությունը դադարեցվի. «Այս հայցադիմումը ներկայացնելով պարզապես չենք կարող պարտվել՝ անկախ նրանից, թե դատավորն ինչ որոշում կկայացնի։ Այդ որոշումը կունենա իր հետեւանքը։ Կարող են այդ հայցադիմումը վարույթ չընդունել, դա նշանակում է, որ Սորոսի գործակալական ցանցն իշխում է այս երկրին։ Եթե մեր պահանջները կբավարարվեն, գոնե նախնական, դա ցույց կտա կյանքի նշաններ»։

Ըստ փաստաբանի՝ գրասենյակի գործունեությամբ զավթվել են պետության կարեւորագույն մարմինները. «Հակակոռուպցիոն կոմիտեն, Սահմանադրական դատարանը, Բարձրագույն դատական խորհուրդը, հիմա սահմանադրական բարեփոխումների, սորոսականները գրում են նոր Սահմանադրություն։ Հակակոռուպցիոն կոմիտեի նախագահն ունի գույք, որի ծագումնաբանությունը պարզ չէ, հայտարարում է, որ դա դստեր հարսանիքի նվերն է, սորոսական Դանիել Իոաննիսյանը գոհ է մնում այդ պատասխանից։ Ապօրինի գույքի բռնագանձման օրենքով 200 հոգու բռնել են, նրանք էլ դուստր կամ որդի կունենան, նրանց հարսանիքին էլ նվեր բերել, թող ասեն՝ սա էլ իմ երեխայի հարսանիքին են նվիրել ու փակեն։ Ինքս դիմելու եմ Գլխավոր դատախազություն՝ պահանջով, որպեսզի ուսումնասիրություն սկսի Սասուն խաչատրյանի գույքի վերաբերյալ»։