Ռուս խաղաղապահները Ռուսաստանից 10 տոննա մարդասիրական օգնություն են հասցրել Լեռնային Ղարաբաղ երեխաների համար

Ռուսական խաղաղապահ զորախմբի զինծառայողներն ապահովել են 10 տոննա մարդասիրական բեռով շարասյան անվտանգությունը Երեւանից Լաչինի միջանցքով դեպի Ստեփանակերտ: Այս մասին հայտնում է ՌԴ ՊՆ մամուլի ծառայությունը։

«Այսօր Երեւանից Ստեփանակերտ է ժամանել 10 տոննա մարդասիրական բեռ։ Տաք վերմակներ, մանկական խաղալիքներ, կոնֆետներ եւ հագուստ։ Այս ամենը կնվիրեն Լեռնային Ղարաբաղի երեխաներին ամանորյա տոների նախաշեմին»,- ասել է ռուսական խաղաղապահ զորախմբի ներկայացուցիչ Ալեքսանդր Կուդրինը։

Բարեգործական կազմակերպությունների մարդասիրական բեռը Մոսկվայից հասցվել է ՌԴ ՊՆ ռազմատրանսպորտային ինքնաթիռով։ Լեռնային Ղարաբաղի քաղաքների եւ հեռավոր շրջանների անապահով եւ բազմազավակ ընտանիքների երեխաների համար բեռների շրջանակներում առաքվել են տաք հագուստ եւ վերմակներ, կոնֆետներ, մանկական խաղալիքներ, սեղանի եւ ուսուցողական խաղեր։

«ՄԵՐՍԻ» բարեգործական կազմակերպությունների ասոցիացիան եւ ռուսական խաղաղապահ զորախումբն այսօր Ստեփանակերտ են բերել մարդասիրական օգնության հերթական խմբաքանակը։ Մարդասիրական օգնությունը հիմնականում ուղղված է սահմանամերձ գյուղերի երեխաներին։ Խաղալիքներ, քաղցրավենիք, որոնք կբաժանվեն բնակավայրերին, քանի որ Ամանորի տոների նախաշեմին ենք։ Նաեւ չորս հարյուր կտոր վերմակ է բերվել։ Շնորհակալ եմ ռուսական խաղաղապահ զորախմբի աջակցության համար, եւ ես ավելի քան վստահ եմ, որ մեր փոխադարձ գործունեությունը կլինի նույնքան արդյունավետ, որքան հիմա էր, եւ ես ցանկանում եմ յուրաքանչյուրիս խաղաղ երկինք, ուրախություն եւ երջանկություն մաղթել»,- ասել է «ՄԵՐՍԻ» բարեգործական հիմնադրամի ներկայացուցիչ Ալեսյա Պոդոլսկայան։

Ռուս խաղաղապահները պարբերաբար միջոցառումներ են անցկացնում տեղի բնակիչների հետ աշխատելու, տեղեկություններ հավաքելու նրանց մասին, ովքեր առավել շատ օգնության կարիք ունեն, շփվում են բարեգործական կազմակերպությունների հետ եւ անհրաժեշտ մարդասիրական օգնություն են փոխանցում Լեռնային Ղարաբաղի մանկական ուսումնական հաստատություններին եւ ընտանիքներին:

Տեղեկատվության հավաքումից եւ մշակումից հետո ռուսական խաղաղապահ զորախմբի հումանիտար արձագանքման կենտրոնի մասնագետները նախատոնական եւ ամանորյա տոներին մարդասիրական ակցիաներ են կազմակերպում Լեռնային Ղարաբաղի կողմերի սահմանամերձ հեռավոր բնակավայրերում։