«Գյումրին Հայաստանի ամենահետաքրքիր քաղաքներից է». Ալեքսանդր Լապշին. (լուսանկար)

Հայտնի բլոգեր Ալեքսանդր Լապշինին Գյումրի էր բերել քաղաքի հին ճարտարապետության և պատմության նկատմամբ հետաքրքրությունը։ Շրջել է քաղաքի պատմական ու հին փողոցներով, թանգարաններով, ծանոթացել քաղաքի կենցաղին ու պատմությանը ու համոզվել է, որ Գյումրին Հայաստանի ամենահետաքրքիր քաղաքներից մեկն է։

«Հայաստանի ամենահետաքրքիր վայրերից է Գյումրին։ Ցարական ժամանակաշրջանի ճարտարապետության նմուշներից մեկ էլ Գորիսում եմ հանդիպել։ Այստեղ այն ավելի ընդգծված է։ Գյումրիում ամեն ինչ տեսնելու համար նվազագույնը 1 շաբաթ է պետք։ Քաղաքը հետաքրքիր է նաև սրանով, որ ունենալով զբոսաշրջության մեծ պոտենցիալ՝ դեռ զբոսաշրջային չէ։ Ամենակարևորը՝ զբոսաշրջության զարգացման համար ենթակառուցվածքներ չկան։ Բացի դրանից՝ պետք չէ միայն քաղաքի կենտրոնի հանդեպ հետաքրքրությունը զարգացնել։ Ինձ, որպես տուրիստի, հետաքրքիր են նաև այն թաղամասերը, որտեղ դեռ երկրաշարժի հետևանքները կան։ Օրինակ՝ Ճապոնիայում ամենապահանջված տուրերը Հիրոսիման և Նագասակին են, որտեղ ցուցադրվում են աղետի հետևանքները»,- SHANTNEWS.am-ին ասել է Ալեքսանդր Լապշինը:

Գյումրիում պահպանված հին ճարտարապետությունը բլոգերի համար նաև ռուսական կայսրության պատմության մի մասնիկ է։ Շենքերից շատերը կառուցվել են ցարական տիրապետության տարիներին։

«Ճարտարապետությունը յուրահատուկ է ամբողջ Անդրկովկասում։ Գյումրին երևի միայն կարող եմ Թբիլիսիի հետ համեմատել։ Այնտեղ էլ հին ճարտարապետության նմուշներ պահպանվել են։ Մեկ էլ Գյումրին հայկական մեկ այլ պատմական քաղաքի՝ Կարսին է նման, որը պատմականորեն այնպես է ստացվել, որ հիմա Ախուրյան գետի մյուս կողմում է»,- ասել է հայտնի բլոգերը:

Ալեքսանդր Լապշինի աչքից չէին վրիպել նաև քաղաքի քանդած փողոցները։ Իհարկե, նա այս ամենը որպես ձգձգվող փողոցաշինություն չէր ընկալել, այլ որպես զբոսաշրջության զարգացմանն ուղղված քայլ։ Հաջորդ տարի ծրագրում է նորից Գյումրի գալ` արդեն բարեկարգ փողոցներում զբոսնող ավելի շատ զբոսաշրջիկների տեսնելու ակնկալիքով։