Լուկաշենկոն նշել է, որ Արցախում դժվար թե հասարակությունը արժանավայել ու լավ ապրի

Բելառուսի նախագահ Լուկաշենկոն Ռուսաստանի հետ ունեցած իր հակասությունները հերթական անգամ ցուցադրել է Արցախի ու արցախյան հիմնախնդրի համատեքստում` նշելով, որ Արցախում դժվար թե հասարակությունը արժանավայել ու լավ ապրի: 

Նախորդ միջադեպը տեղի ունեցավ բլոգեր Լապշինի արտահանձնման հայտնի միջադեպի հետ կապված, երբ կրկին կիզակետում էր Արցախը:

Այս ուղերձները, որոնք հասցեագրված են ինչպես Ռուսաստանին, այնպես էլ Հայաստանին, արդեն խոսում են հստակ քաղաքական գծի ու միտման մասին: 

Մի կողմից, Բելառուսի նախագահը ձգտում է Ռուսաստանի նկատմամբ ճնշումների բանեցմամբ քաղաքական շահեկան դիրքերում հայտնվել ԵՏՄ ու ՀԱՊԿ շրջանակներում: 

Մյուս կողմից, ակնհայտորեն հարց է առաջանում` ինչու է բելառուսական կողմը իր հակասությունները Ռուսաստանի հետ փորձում կարգավորել արցախյան հարթությունում: Տրամաբանությունը հուշում է, որ Լուկաշենկոյի նման դիրքորոշումը թերևս անուղղակիորեն է վերաբերում Հայաստանի կամ Արցախի շահերին:

Խոշոր հաշվով Լուկաշենկոն Ռուսաստանի հետ իր տարաձայնությունները փորձում է քաղաքական դաշտից տեղափոխել ռազմաքաղաքական հարթություն: Խնդիրը նրանում է, որ Մերձավոր Արևելքում ՌԴ արձանագրած մարտավարական ընթացիկ հաջողությունները ամրապնդելու համար պաշտոնական Մոսկվայի համար էական նշանակություն է ստանում կայունության պահպանման հիմնահարցը ՌԴ սահմանների երկայնքով և առաջին հերթին` արցախյան ուղղությամբ: Այս առումով Լուկաշենկոն, Ադրբեջանի ղեկավարության հետ փոխգործակցությամբ փորձում է հարավկովկասյան տարածաշրջանում ապակայունացնել իրավիճակը:

Ի դեպ, Բելառուսի ղեկավարությունը ներկայում շարժվում է նույն այն սցենարով, որով անցավ Ուկրաինան:

Սցենարն իսկապես գրեթե միատեսակ է` տնտեսական ու քաղաքական հակասությունների խորացում Ռուսաստանի հետ, Ուկրաինայի կողմից Ադրբեջանին սպառազինությունների մատակարարումներ, Ուկրաինայի քաղաքական վերնախավում հակառուսական, հակահայկական դիրքորոշումների հաստատում և այլն:

Նկատենք նաև, որ Ուկրաինան, հետևելով արևմտյան առաջատար երկրներում բավական լավ մշակված սցենարին, այսօր կորցրեց Ղրիմը, կանգնած է պետականության ու տարածքային ամբողջականության պահպանման լրջագույն խնդրի առջև:

Սցենարը գրեթե կրկնվում է նաև Բելառուսի դեպքում: Ի դեպ, ամենևին էլ պատահականություններ չեն տեղեկատվական դաշտում նետված այն լուրերը, որոնց համաձայն արևմտյան և ՆԱՏՕ-ին մոտ կանգնած առաջատար վերլուծական կենտրոններում հաճախակի են դարձել քննարկումները դեպի Բելառուս ՌԴ ռազմական հնարավոր առաջխաղացման մասին և այս ուղղությամբ տարբեր սցենարների և հնարավոր հակաքայլերի մշակումները:

Կարեն Վերանյան. Ֆեյսբուք