Հայտարարությունից՝ գործնական քայլեր. ներդրումային հիմնադրամները ձևավորվում են

Հայաստանի համար կենսական նշանակություն ունի ներդրումային հոսքերի ավելացումը: Այս ուղղությամբ մշտապես քայլեր են իրականացվել, սակայն անելիքներ դեռ շատ կան: Փորձ է արվում մեծացնել Հայաստանի ներդրումային գրավչությունը օտարերկրյա տնտեսվարողների համար: Քայլերից մեկը կարելի է համարել ներդրումային հիմնադրամների ձևավորումը:

Օրերս «Ուղղակի ներդրումների ռուսական հիմնադրամի» և Հայաստանի «ՓՄՁ ներդրումներ» ունիվերսալ վարկային կազմակերպության միջև ստորագրվեց համաձայնագիր, ըստ որի կստեղծվի հայ-ռուսական ներդրումային հիմնադրամ։

Հիմնադրամի կապիտալը սկզբնական փուլում լինելու է 100 մլն դոլար, իսկ հետագայում, կախված անհրաժեշտությունից, այն կարող է ավելանալ։ Հիմնադրամը հիմնականում ֆինանսավորելու է գյուղատնտեսության, արդյունաբերության, տրանսպորտի, ենթակառուցվածքների ոլորտներին։

Առաջիկայում ակնկալվում է հիմնել նաև Հայաստանի ներդրումային հիմնադրամ, որի մասին մոտ օրերս ավելի հստակ հայտարարություններ կհնչեն: Հիմնադրամի նախնական կապիտալը կկազմի 100 մլն դոլար, որի ձևավորմանը պատրաստվում են մասնակցել այն գործարարները, ովքեր վարչապետի մոսկովյան այցի ժամանակ պատրաստակամություն էին հայտնել ՀՀ-ում իրականացնել ներդրումային ծրագրեր:

Ներդրումային հիմնադրամների ձևավորումը լավ հիմք կարող է հանդիսանալ Հայաստանում մասնավոր կապիտալի գործունեության ակտիվացման ճանապարհին: Այս տարի կառավարությունն ակնկալում է իրականացնել շուրջ 850 մլն դոլարի ներդրումային ծրագրեր: Բացի այս, ներդրումային կապիտալի ավելացման համար ստեղծվել է ներդրումային ծրագրերի միասնական հարթակ։

Մասնավոր հատվածից, ճյուղային նախարարություններից, մարզերից և համայնքներից ներգրավվել են շուրջ 5,2 մլրդ դոլարի բազմաթիվ բիզնես-ծրագրեր։ Հստակեցվել են ավելի քան 3,2 միլիարդի ֆինանսական ապահովվածության խնդիրները։

Կարինե Սանթրոսյան. Ֆեյսբուք