Ինչպե՞ս կանխել աղանդավորական շարժումների առաջխաղացումը. պարզաբանում է Սևան Աղաջանյանը

Աղանդավորական շարժումները մեր հասարակության մեջ նորություն չեն, մինչդեռ վերջին շրջանում դրանք տարածման նոր թափ են առել: Դրանք չեն ճանաչում ո’չ սեռ, ո’չ տարիք: Աղանդավորական շարժումների դեմ պայքարելն այսօր այդքան էլ հեշտ չէ, հատկապես, որ վերջիններս ազատ և անարգել տարածում են գրականություն հանրապետության տարածքում: Ներկայումս շարժումների դեմ պայքարի մի շարք միջոցներ են կիրառվում: Սրանում հատկապես ակտիվ է «Ազգային արժեքների պահպանման ճակատ» ՀԿ-ն: Պարզելու համար, թե ինչ հիմնավոր միջոցներ է կիրառում ՀԿ-ն աղանդավորական շարժումների դեմ պայքարում՝ Operativ.am-ի թղթակիցը զրուցեց ՀԿ նախագահ Սևան Աղաջանյանի հետ:

«Աղանդ» բառը հասարակության մեջ այնքան է հոլովվել, որ ցավոք արդեն սովորականի նման է սկսվում ընկալվել: Ու քանի դեռ ինչ-ինչ եվրոպարտավորություններ մեզ ստիպում են այս ամենին եվրոակնոցներով նայել, այս կառույցները ծաղկում ու զարգանում են: Այս բառն իր ստվերի տակ է վերցրել անգամ հայրենի շոուբիզնեսի մի մասը: Քայքայիչ աղանդների դեմ պետք է տարվի ամենօրյա աշխատանք։ Մենք պարբերաբար ծրագրեր ենք իրականացնում երիտասարդական տարբեր խմբերի հետ՝ ներկայացնելով քայքայիչ աղանդների բացասական ազդեցությունը»,-մեզ հետ զրույցում նշեց ՀԿ նախագահը:

Աղանդավորական շարժումների դեմ պայքարում վերջինս հատկապես կարևորում է կառավարության միջամտությունը և օրենքի միջոցով պայքարը: Այսօր այս շարժումների դեմ պայքարելու համար պակաս կարևոր չէ նաև հասկանալ, թե ինչու են մարդիկ ներգրավվում դրանց մեջ: Սևան Աղաջանյանի կարծիքով սրա պատճառն այն է, որ հայ մարդը այդքան էլ լավ չի ճանաչում և զգում եկեղեցին, մինչդեռ վերջինս անում է այն, ինչ կարողանում է մարդկանց աղանդավորական շարժումների ազդեցությունից զերծ պահելու համար:

«Մեր հոգևորականներն ի տարբերություն աղանդավորականների`շատ չեն պատմում և խոսում իրենց կատարած բոլոր գործերից և քայլերից: Այդ պատճառով Հայ Եկեղեցու առօրյա կյանքի մասին, նրա օգտակար գործունեության մասին մարդիկ գրեթե բան չգիտեն: Դրա հակառակ շատ լավ տեղեկացված են աղանդավորների «բարի և օգտակար» գործերից: Դրան նաև մի բան է գումարվում: Հայ եկեղեցին նաև մեծ օրգանիզմ է և հետևաբար ամեն բան այնտեղ իդեալական չի կարող լինել: Ամեն մի հոգևորական չէ, որ իդելական է, կամ ամեն մի երևույթ չէ, ոչ իդելական է: Դա նորմալ և հասկանալի երևույթ է: Մարդիկ միանգամից նկատում են թույլ կետերը, իսկ իրականությունը մնում է անհայտ մարդկանցից, ինչից լավ օգտվում են աղանդավորները»,-ընդգծեց զրուցակիցս:

Ինչ վերաբերում է աղանդավորական շարժումներ դեմ պայքարին, ապա ՀԿ նախագահը կարծում է, որ պայքարում առաջնային քայլը Հայ Առաքելական Եկեղեցու դեմքը ճանաչելն է:

«Կրոնական կազմակերպությունն իրենց գրականությունը պրոպագանդող ստենդներ են տեղադրում փողոցներում, ինչն անթույլատրելի է և օրենքի կոպիտ խախտում: Օրենքում նշվում է, որ կրոնական կազմակերպությունն իրավունք ունի քարոզներ անելու իր համար նախատեսված վայրում, իսկ փողոցը հասարակական վայր է: Իմ կարծիքով, աղանդերը կլինեն այնքան ժամանակ, քանի դեռ կան մարդիկ, ովքեր պատրաստ են «փող պատրաստել» հավատքից և նրանք , ովքեր պատրսատ են «գնել այդ հավատքը»,-նշեց զրուցակիցս:

Ինչպես տեսնում ենք աղանդավորական շարժումները գնալով ծաղկում են: Դրանք եղել են, կան ու կլինեն: Մինչդեռ դրանց դեմ պայքարելու համար անհրաժեշտ է հրատապ միջոցներ ձեռնարկել և առաջնահերթ պետք է սկսել նրանց տարածած գրականության համար արգելքներ դնել և հոգևոր սնունդը եկեղեցում փնտրել:

Հ.Գ. Թեմայի վերաբերյալ հոգևորականի տեսակետը կներկայացնենք քիչ ուշ:

Վարդուհի Ստեփանյան