Ի՞նչ արժեք ունեցավ Հովիկ Աբրահամյանի հանդիմանությունը
«Հովիկ Աբրահամյանը վարչապետի պաշտոնը ստանձնելուց մեկուկես ամիս անց կառավարության հերթական նիստի ժամանակ հրապարակավ հանդիմանեց իր ենթականերին' դեսպանների հետ արդյունավետ չհամագործակցելու համար: Նա հայտարարեց, որ արտերկրում հավատարմագրված ՀՀ դեսպաններն իրեն բողոքել են, որ նախարարներից ներդրումային ծրագրեր չեն ստանում: «Դեսպաններն ասել են, որ իրենց առաջարկությունները պատշաճ ուշադրության չեն արժանանում նախարարների կողմից:
Դեսպաններն ասում են, որ չեն ստանում ներդրումային առաջարկություններ նախարարություններից: Դեսպանները, եթե հանդիպում են ներդրողներին, պետք է ունենան ծրագրեր: Համապատասխան նախարարները պետք է մտածեն դեսպաններին լիարժեք ներդրումային ծրագրեր տրամադրելու մասին»,-խրոխտ հայտարարեց վարչապետն ու հանձնարարեց պատրաստել ծրագրեր և ԱԳ նախարարի միջոցով ներկայացնել դեսպաններին: Այս խոսակցությունից անցել է գրեթե 3 ամիս: Թե այս ընթացքում ինչ է փոխվել, ինչ ծրագրեր են նախարարները ներկայացրել դեսպաններին, հետաքրքրվեցինք մի քանի գերատեսչություններից:
Առողջապահության նախարարության մամլո խոսնակ Անահիտ Հայթայանը մեզ հետ զրույցում ասաց, որ այժմ ավելի ակտիվացել է արտերկրում և ՀՀ-ում հավատարմագրված դեսպանների միջոցով իրականացվող աշխատանքը: «Առողջապահության նախարարությունը միջազգային կապերի միջոցով լայնածավալ աշխատանքներ է իրականացնում: Երկկողմանի հարաբերություններ ունենք տասնյակ երկրների հետ, համագործակցում ենք նաև միջազգային կառույցների, մասնավորապես ՄԱԿ-ի Առողջապահության համաշխարհային կազմակերպության շրջանակներում ընդգրկված 52 երկրների հետ՝ և տեղեկատվության, և փորձի փոխանակման, և տարբեր ոլորտներում ընդհանուր քաղաքականության մշակման մասով:
Ունենք հումանիտար և դրամաշնորհային ուղղության, օրինակ, ԱՄՆ-ի, Ռուսաստանի Դաշնության և միջազգային կազմակերպությունների, մասնավորապես Համաշխարհային բանկի գլոբալ ֆոնդի հետ: Բոլոր հարաբերությունները կանոնակարգով իրականացվում են այդ երկրներում հավատարմագրված մեր դեսպանների և մեր երկրում այլ երկրների դեսպանների միջոցով»: Քաղաքաշինության նախարարության մամլո խոսնակ Անահիտ Եսայանը նկատեց, որ այդ նպատակով ստեղծվել է կառուցապատման ներդրումային ծրագրերի վարչություն:
Ինչպես նաև, միջազգային համագործակցությունը խթանելու նպատակով, արտաքին կապերի բաժնի փոխարեն նախարարությունում ստեղծվել է արտաքին կապերի վարչություն: «Կատարված փոփոխությունները համահունչ են նաև ՀՀ վարչապետի ներդրումների խրախուսմանը միտված հանձնարարականին' ուղղված կառավարության անդամներին: Քաղաքաշինության նախարարության կազմում ներդրումային վարչության ստեղծմամբ հնարավոր կլինի առավել համակարգված աշխատանք ծավալել՝ ներդրումային ծրագրերը խրախուսելու համատեքստում:
Այս առումով նախարարությունն արդեն իսկ բազմաթիվ մտահղացումներ ունի: «Հայկական տուն» ճարտարապետական բաց մրցույթի նախաձեռնում «Մոնարխ» ընկերության հետ համատեղ: Ակնկալվում է, որ մրցույթի շրջանակում հայկական տարբեր բնակավայրերի ավանդույթներին և տեղանքին բնորոշ, տեղական շինարարական նյութերի օգտագործմամբ, տների բազմաթիվ հետաքրքիր նախագծեր կներկայացվեն»:
Առավել մանրամասն՝ «Հրապարակ» թերթի այսօրվա համարում: