Սերժ Սարգսյանը կոչ է արել Թուրքիային ճանաչել Հայոց Ցեղասպանությունը. ռուսական մամուլի անդրադարձը
Հայաստանի նախագահ Սերժ Սարգսյանը հայտարարել է, որ Թուրքիան պետք է ճանաչի 1915թ. տեղի ունեցած Հայոց Ցեղասպանությունը: Նրա կարծիքով` միայն այս նախապայմանով հնարավոր կլինի կանխել նման իրադարձությունների կրկնությունը: Այս մասին գրում է "Интерфакс"-ը.
«Սերժ Սարգսյանի ապրիլի 24-ի ուղերձի մեջ ասվում է. «Հայերի Ցեղասպանությունը չի կարելի համարել ավարտված մինչ այն պահը, երբ Օսմանյան Կայսրության իրավահաջորդները շարունակում են ժխտել՝ ակնհայտը: Մենք համոզված ենք, որ հանցագործության հերքումը հանդիսանում է նրա անմիջական շարունակությունը: Միայն ճանաչումը և դատապարտումը կարող է կանխել նման իրադարձությունների կրկնությունը»:
Բացի այդ նախագահը նշել է, որ Հայաստանը Թուրքիայի հասարակությանը չի համարում որպես թշնամի. «Մենք մեր գլուխները խոնարհելով անմեղ զոհերի հիշատակին նաև հիշում ենք բոլոր այն թուրքերին, թուրք ընտանիքներին, որոնք այդ ծանր օրերին իրենց ձեռքը մեկնեցին իրենց հարևան և ընկեր հայերին, բարբարոսների ճանկերից փրկեցին բազմաթիվ հայ մանուկների»,-ասվում է ՀՀ նախագահ Սերժ Սարգսյանի ուղերձում»: