Ես նոր մարդ եմ բանակցություններում, ուզում եմ հասկանալ՝ ով է ճիշտ, ով՝ սխալ. Փաշինյան
Վարչապետ Նիկոլ Փաշինյանը մարտի 19-ին լրագրողների հետ հանդիպմանն անդրադարձավ ԼՂ հակամարտության կարգավորման բանակցային գործընթացին: Նա կրկին ուշադրություն հրավիրեց սկզբունքների հստակեցման անհրաժեշտությանը:
«Որպեսզի հասկանանք դրանք, պետք է հասկանանք՝ ինչ են նշանակում այդ սկզբունքները: Մենք ունենք տեքստ և տասնյակ մեկնաբանություններ, որ արվում են պետական մակարդակով: Պետք է հասկանանք՝ ինչ մեկնաբանության վրա ենք հենվելու հետագա բանակցությունների ընթացքում, այն մեկնաբանությունը, որ տալիս է Ադրբեջանը, անընդունելի է մեզ համար: Մենք կարող ենք մեր մեկնաբանությունն ասել, բայց չենք գնում այդ ճանապարհով, քանի որ մեր խնդիրը լեզվակռվի մեջ չէ:
Մենք ուզում ենք միասին հասկանալ՝ այդ սկզբունքներն ինչ են նշանակում, ինչ կարող են նշանակել գործնականում: Ադրբեջանը մեկնաբանում է, որ Ղարաբաղը պետք է լինի Ադրբեջանի մաս, սա մի մեկնաբանություն է, կարող է լինել մեկնաբանություն, որ Ղարաբաղը պետք է լինի անկախ պետություն, կամ որ պետք է լինի Հայաստանի մաս: Քանի դեռ բոլորով չենք համաձայնեցրել խոսակցության շրջանակը, թե մենք ինչի մասին ենք խոսում, մենք իրար չենք հասկանում»,- ասաց նա:
Փաշինյանը նշեց, թե ինչու այս խնդիրների մասին չէր խոսում 2018 թ. մայիսին: Պատճառն, ըստ վարչապետի, այն է, որ այս անհրաժեշտությունը ծագել է Ադրբեջանի նախագահի, ԵԱՀԿ ՄԽ համանախագահողների հետ ունեցած քննարկումների, ինչպես նաև միջազգային այլ գործընկերների հետ ունեցած քննարկումների արդյունքում: Նա ընդգծեց՝ կան տարբեր մեկնաբանություններ, մի մասը՝ հրապարակային, մի մասը՝ ոչ հրապարակային, ասաց՝ կան միջազգային գործընկերներ, ում չի կարող հղում անել, ովքեր ասում են՝ այդ սկզբունքները նշանակում են, որ Ղարաբաղը չի կարող ակնհայտորեն լինել Ադրբեջանի կազմում, մեկ ուրիշն ասում է՝ չի կարող լինել Ադրբեջանի կազմից դուրս:
«Ես նոր մարդ եմ բանակցություններում, ուզում եմ հասկանալ՝ ով է ճիշտ, ով՝ սխալ: Վարչապետ ընտրվելուց հետո ԱԳ նախարարի հետ մենք հանդիպում ենք ունեցել ԱԳ նախկին նախարար Էդվարդ Նալբանդյանի հետ, խնդրել ենք՝ գա և մեզ որոշակի տեղեկություններ ներկայացնի: Այս գործընթացը շարունակվում է, որ ասում էին՝ ինչ եք խոսում, Ալիևի հետ այնտեղ արդեն բոլոր հնարավոր դավադրությունների սցենարները կան, հավաստի աղբյուրները հանդիպումից առաջ պատմել են՝ ինչ է տեղի ունեցել: Իրականում խոսքը եղել է գործընթացի պատմության մասին: Ես ունեմ բազմաթիվ հարցեր բոլորին, նույնիսկ երկրների ղեկավարների հետ եմ այդ հարցերը քննարկել, քանի որ կան այսպիսի մեկնաբանություններ, տեղեկություններ, ո՞րն է ճիշտ, ինձ պետք է հասկանալ՝ ինչ է կատարվում: Կան մարդիկ, որ ասում են՝ պետք չէ հասկանալ, եկել ես, նստիր, նույն կետից շարունակիր, բայց պետք է հասկանալ՝ ինչ է նշանակում ամեն բառը»,- ասաց նա:
Փաշինյանը կրկին շեշտեց՝ այս ամենը ոչ թե քմահաճույք է, այլ անհրաժեշտություն, սա շատ բարդ գործընթաց է, ունի բազմաթիվ նրբություններ, որևէ մեկը, երբ ուզում է բանակցություններում ներգրավված լինել, պետք է տիրապետի ողջ տեղեկատվությանը: Վարչապետն ընդգծեց՝ Ադրբեջանի նախագահ Իլհամ Ալիևն ավելի քան 10 տարի բանակցային գործընթացի մեջ է, համանախագահների համար դա իրենց աշխատանքն է, և միակ մարդը, որ նոր է, ինքն է:
«Հուսամ՝ ոչ ոք չի ակնկալում, որ կգամ, կասեմ՝ ինձ ոչինչ հետաքրքիր չէ, ամեն ինչ պարզ է: Պարզ չէ, երկխոսության նպատակը հենց բազմաթիվ հարցեր պարզաբանելն է, առաջիկա հանդիպումը՝ առնվազն մեր ընկալմամբ, նվիրված կլինի այդպիսի մի շարք պարզաբանումներ պաշտոնապես արձանագրելուն»,- նշեց Փաշինյանը: