Կառավարության ծրագրի բովանդակությանը վերաբերող կառուցողական առաջարկ ընդդիմության կողմից չլսեցի․ Տիգրան Ավինյան

Կառավարության ծրագրի բովանդակությանը վերաբերող կառուցողական առաջարկություն չլսեցի ընդդիմության կողմից: Այսօր ԱԺ-ում լրագրողների հետ զրույցում նման հայտարարություն արեց ՀՀ փոխվարչապետ Տիգրան Ավինյանը՝ անդրադառնալով կառավարության ծրագրի քննարկմանը։ Նա կցանկանար, որ խորհրդարանի հետ ավելի կառուցողական քննարկում լիներ՝ վստահեցնելով, որ կառավարությունը պատրաստ է առաջարկներ լսել։

«Խոսում են կոնցեպտուալ խնդրի մասին՝ ինչու թիվ չկա, ինչու կա և այլն, անընդհատ այս բանավեճի մեջ ենք: Այն, ինչ գրված էր տնտեսության մոդելի առումով, ներառականության առումով, մրցակցության և արտահանման ճյուղերի առումով, բովանդակային քննարկման չարժանացավ, որի համար ցավում եմ: Կցանկանայի, որ վերադառնայինք կառուցողական դաշտ և ավելի բովանդակային քննարկումներ ծավալեինք»,- ասաց Տիգրան Ավինյանը:

Փոխվարչապետն անդրադարձավ նաև ԼՀԿ խմբակցության ղեկավար Էդմոն Մարուքյանի երեկ հնչեցրած քննադատությանը։ Դիտարկմանը, որ Մարուքյանը հայտարարում է, թե կառավարությունն արհամարհել է խորհրդարանին, չի քննարկել խորհրդարանի ուժերի հետ, իսկ ՀՀԿ-ի իշխանության ժամանակ նման ավանդույթ կար, Տիգրան Ավինյանը պատասխանեց․ «Չգիտեմ՝ ինչպիսի ավանդույթներ են եղել հանրապետականների ժամանակ, բայց սա կառավարության ծրագիրն է, որը ներկայացվում է 20-օրյա ժամկետում է: Դրա պատասխանը կրում է կառավարությունը, բայց սա կառավարության և ԱԺ ծրագիրը չէ», - ընդգծեց Ավինյանը:

Տիգրան Ավինյանը շեշտեց՝ սա կառավարության ծրագիրն է, այլ ոչ թե կառավարության ու ԱԺ-ի։