Պերմյակովի և Ռազգիլդեևի գործերում փաստական հանգամանքները տարբեր են. փաստաբան

Շիրակի մարզի ընդհանուր իրավասության դատարանը սկսել է Ջուլիետա Ղուկասյանի իրավահաջորդների փաստաբանների բողոքի քննությունը, որը վերաբերում է կնոջ մահվան մեջ մեղադրվող ռուս զինծառայողին ռազմաբազայից ՀՀ ՔԿՀ տեղափոխելուն: Տուժողի իրավահաջորդի ներկայացուցիչ Արայիկ Զալյանը լրագրողների հետ զրույցում խոսել է այն նմանությունների և տարբերությունների մասին, որ կան Ջուլիետա Ղուկասյանի և Ավետիսյանների սպանության գործերի միջև: Ըստ փաստաբանի՝ Ռազգիլդեևին, ի տարբերություն Պերմյակովի, ռուս իրավապահները չեն հայտնաբերել ու ձերբակալել: Համենայնդեպս, այս մասին պաշտոնական տեղեկություն չկա:

«Տվյալ գործի հետ կապված շարունակվում է այն, ինչ տարիներ առաջ ունեցանք մենք: Պերմյակովի և Ռազգիլդեևի գործերում փաստական հանգամանքները մի քիչ տարբեր են: Ջուլիետա Ղուկասյանի դեպքն ավելի ունիկալ է իր փաստերով, այն առումով, որ տվյալ դեպքում մեղադրյալը պետք է լինի ՀՀ ՔԿՀ-ում »,- ասել է փաստաբան Արայիկ Զալյանը:

Թե ինչ պայմաններում է պահվում մեղադրյալը, տուժողի իրավահաջորդի ներկայացուցիչները տեսակցելու իրավասություն չունեն: Առայժմ ռազմաբազայում գտնվող Ռազգիլդեևին չի տեսակցել նաև Հայաստանի մարդու իրավունքների պաշտպանը: Ըստ փաստաբան Արայիկ Զալյանի՝ կրկնվում է նույն սցենարը, ինչ Վալերի Պերմյակովի դեպքում էր:

«Ունենք կոնվենցիայի երկրորդ հոդվածի հետ կապված մտահոգություններ: Իսկ այդ հոդվածում ասվում է, որ պատիժը պետք է լինի իրական: Տվյալ պարագայում պատիժն իրական է, թե ոչ, մենք որևիցե տեղեկություն չունենք: Միևնույն ժամանակ, ունենք մտահոգություն , ինչը տեսանք Պերմյակովի դեպքում: Եթե հիշում եք, Պերմյակովը Վերաքննիչ դատարան չներկայացավ: Մինչև հիմա մեր մոտ հարց է առաջանում՝ արդյոք դա իր կամքով էր կամ իր կամքով չէր: Առկա էին իրարամերժ գրություններ: Կար գրություն, որտեղ Պերմյակովը հայտնում էր, որ ցանկանում է ներկայանալ, որին հաջորդեց ևս մեկ գրություն, համաձայն որի՝ չէր ցանկանում ներկայանալ: Արդյոք դա իր կողմից էր գրվել, ով նրան տեսավ, չտեսավ, պարզ չէ»,- ասել է Արայիկ Զալյանը:

Գյումրեցի Ջուլիետա Ղուկասյանին ծեծելով մահվան հասցնելու գործի նախաքննությունը դեռ ավարտված չէ: Տուժողի իրավահաջորդներին միայն հայտնի է, որ նույն օրը ևս մեկ անձ է տուժել ռուս զինծառայողի գործողություններից: