Որոշ խիստ շահագրգիռ անձինք ու շրջանակներ փորձում են շահարկել դատախազության անունը. Գոռ Աբրահամյան
Հայաստանի գլխավոր դատախազի խորհրդական Գոռ Աբրահամյանը Facebook-ի իր էջում արձագանքել է ԵԿՄ վարչության նախկին նախագահ Մանվել Գրիգորյանին ազատ արձակելու առթիվ դատախազության անունը շահարկողներին:
Աբրահամյանը նշել է` նկատի ունենալով, որ որոշ խիստ շահագրգիռ անձինք ու շրջանակներ փորձում են Մանվել Գրիգորյանի նկատմամբ այլընտրանքային խափանման միջոց գրավի կիրառման վերաբերյալ առաջին ատյանի ընդհանուր իրավասության դատարանի որոշման ներքո շահարկել դատախազության և գլխավոր դատախազի անունը, իսկ բողոքի ակցիայի մասնակիցները գլխավոր դատախազից հավաստիացում են ապահանջում դատարանի որոշման դեմ բողոք ներկայացվելու վերաբերյալ, հարկ է համարում հիշեցնել, որ խնդրո առարկայի վերաբերյալ ՀՀ գլխավոր դատախազ Արթուր Դավթյանն իր հստակ դիրքորոշումն արտահայտել է դեկտեմբերի 8-ին տված հարցազրույցներից մեկում:
«Անհարկի ենք համարում նմանատիպ որևէ շահարկում, միաժամանակ հավաստիացնում, որ դատախազությունը առաջին ատյանի դատարանի կողմից կայացված որոշման դեմ վերաքննիչ բողոք է ներկայացնելու՝ այն հիմնավոր չլինելու պատճառով»,- նշել է նա: