Ի՞նչ է խնդրել Ժոզե Մոուրինյոն լրագրողներին

«Մանչեստեր Յունայթեդի» արդեն նախկին մարզիչ Ժոզե Մոուրինյոն դիմել է լրագրողներին՝ խնդրելով հարգել իր անձնական կյանքը:

Պորտուգալացին գլխավորել է անգլիական ակումբը 2016 թվականից: Իր ղեկավարությամբ «Մանչեստեր Յունայթեդը» նվաճել է Անգլիայի գավաթը, Սուպերգավաթը, ինչպես նաև դարձել Եվրոպա Լիգայի հաղթող:

«Ես հպարտանում էի՝ կրելով «Մանչեստեր Յունայթեդի» զինանշանը, և հավատում եմ, որ երկրպագուները հասկանում են դա: Ինչպես նախորդ ակումբների պարագայում, ես աշխատում էի հրաշալի մարդկանց հետ և հավատում եմ, որ նրանցից մի քանիսը կդառնան իմ ընկերներն ամբողջ կյանքում: Գիտեմ, որ բոլորին հայտնի են իմ մասնագիտական սկզբունքները: Ես միշտ խուսափել եմ կարծիքներ հայտնել ակումբներում ինձ նախորդած գործընկերներիս մասին: Հուսով եմ, որ լրատվամիջոցները կհարգեն իմ դիրքորոշումը և կթողնեն, որ ես ապրեմ նորմալ կյանքով, մինչև այն պահը, երբ նորից կորոշեմ վերադառնալ մեծ ֆուտբոլ»,- մեջբերել է Մոուրինյոյի խոսքերը The Independent պարբերականը:

Հիշեցնենք, որ բրիտանական The Guardian-ը գրել է, որ պայմանագիրը վաղաժամ դադարեցնելու համար պորտուգալացին կստանա շուրջ 15 միլիոն ֆունտ սթերլինգ, կամ մոտ 16․7 միլիոն եվրո: Daily Mail-ը, սակայն, այլ հաշվարկ ունի: Ըստ այս պարբերականի՝ խոսքը 22․5 ֆունտ սթերլինգի, կամ շուրջ 25 միլիոն եվրոյի մասին է: