Ծաղկի խանութը թալանած տղամարդուն մեղադրանք է առաջադրվել

Ծաղկի խանութի աշխատակցուհու նկատմամբ դանակով կատարված ավազակային հարձակման դեպքի մի շարք հանգամանքներ է պարզել ՀՀ քննչական կոմիտեի ԵՔՔՎ Կենտրոն և Նորք-Մարաշ վարչական շրջանների քննչական բաժինը․ մեկ անձի մեղադրանք է առաջադրվել: Այս մասին տեղեկացնում է քննչական կոմիտեի մամուլի ծառայությունը։

Նախնական տվյալներով՝ 2018 թվականի նոյեմբերի 30-ին՝ ժամը 05.36-ին, 46-ամյա տղամարդը, օգտվելով ծաղկի խանութ-սրահում վաճառողուհու միայնակ գտնվելու հանգամանքից, այցելել է խանութ-սրահ, իր հետ նախապես վերցրած դանակով աշխատակցուհու կյանքին և առողջությանը վտանգավոր բռնություն գործադրելու սպառնալիքով, այն է՝ որովայնի ձախ հատվածին սեղմելով, պահանջել է դրամարկղում առկա գումարն ու այլ արժեքավոր իրեր: Հնչեցված սպառնալիքներից ահաբեկված՝ ծաղկի սրահի աշխատակցուհին տղամարդուն տվել է դրամարկղում առկա 260.000 ՀՀ դրամ գումարը, «Լենովո A 328» մոդելի բջջային և «Պանասոնիկ» տեսակի հեռախոսները, ինչպես նաև՝ 3 հատ վարդ:

Դեպքի առթիվ 2018թ. նոյեմբերի 30-ին հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 4-րդ կետով: Խանութի սեփականատերը և աշխատակցուհին ճանաչվել են տուժող։

Քննչական և օպերատիվ-հետախուզական միջոցառումների արդյունքում պարզվել է առերևույթ հանցագործություն կատարած անձի ինքնությունը, որը Երևանի բնակիչ է` ծնված 1972 թվականին: Վերջինս ձերբակալվել է:

Քրեական գործով էական հանգամանքներ պարզելու համար նշանակվել են փորձաքննություններ:

2018թ. դեկտեմբերի 3-ին նրան մեղադրանք է առաջադրվել՝ ՀՀ քրեական օրենսգրքի 175-րդ հոդվածի 2-րդ մասի 4-րդ կետով և 182-րդ հոդվածի 2-րդ մասի 3.1-րդ կետով: Քննիչը միջնորդություն է ներկայացրել դատարան՝ նրա նկատմամբ որպես խափանման միջոց կալանավորում ընտրելու վերաբերյալ: