Սահմանապահ ժողովուրդը խաղաղություն է պարտադրում հակառակորդին, մարդիկ Երևանում հանգիստ ապրում են. Մարուքյան

Այն, ինչ պետությունը մինչ օրս արել է սահմանամերձ գոտու համար, իրապես ոչինչ է ձեր հերոսական անցյալի և ներկայի դիմաց: Տավուշի մարզի Մովսես գյուղում ընտրողների հետ հանդիպմանն ասաց «Լուսավոր Հայաստան» կուսակցության համապետական ցուցակը գլխավորող Էդմոն Մարուքյանը:

Նրա խոսքով՝ պետությունն ամեն ինչ պիտի անի, որ սահմանապահ ժողովուրդը որևէ խնդիր չունենա: «Դուք սարի պես այստեղ կանգնած եք, մարդիկ Երևանում հանգիստ ապրում են: Շատերը չգիտեն էլ, որ նման բնակավայրեր կան, բայց այստեղի ժողովուրդը խաղաղություն է պարտադրում հակառակորդին, և պետք է իրապես այնպես անենք, որ այստեղ կյանքը զարգանա»,- նշեց ԼՀԿ նախագահը:

Նա ընդգծեց, որ համայնքների տարածքային համաչափ զարգացումը շատ քիչ է մարդկանց ամենօրյա դարդերը հոգալու համար, ուստի, ըստ Մարուքյանի, սահմանամերձ համայնքները պետք է գտնվեն պետական հատուկ հոգացության ներքո: «Իզուր չէ, որ «Լուսավոր Հայաստանն» այստեղ թեկնածու ունի, ով խնդիրներն արդեն հավաքագրել է, մենք նաև որոշել ենք սահմանամերձ շրջանների խնդիրներն ուսումնասիրող խումբ ստեղծել, որը պարբերաբար ամեն ինչ կանի, որ այստեղ ապրող մարդիկ երբեք չմտածեն այստեղից գնալու մասին»,- ասաց Էդմոն Մարուքյանը:

ԼՀԿ նախագահն անդրադարձավ նաև սահմանամերձ բնակավայրերը հարկերից ազատելու մասին օրենքին՝ նշելով, որ իր շփումները ցույց են տվել, որ դա որևէ նշանակություն չի ունեցել: «Ընդունում ենք օրենքներ, որոնք մնում են թղթի վրա՝ մարդկանց և իրականության հետ կապ չունեցող, և դրանք հետո դառնում են ուղղակի պոպուլիստական ելույթների թեմա:

Դուք պետք է մասնակցեք օրենսդրական փոփոխություններին, քանի որ Երևանում նստած հնարավոր չէ օրենքի նախագիծ գրել այստեղ ապրող մարդկանց մասին»: