Կան մարդիկ, որոնք փորձում են իրականացնել նախապատրաստական աշխատանքներ ընտրակաշառք բաժանելու ուղղությամբ. Վանեցյան
Կան մարդիկ կամ մարդկանց խմբեր, որոնք փորձում են իրականացնել նախապատրաստական աշխատանքներ ընտրակաշառք բաժանելու ուղղությամբ, նրանք Ազգային անվտանգության ծառայության հսկողության տակ են։ Այս մասին այսօր՝ նոյեմբերի 28-ին, լրագրողների հետ զրույցում ասաց Ազգային անվտանգության ծառայության տնօրեն Արթուր Վանեցյանը։
Հարցին՝ պատրա՞ստ են գաղտնալսման սարքերը, որպեսզի կանխվեն ընտրախախտումները, Վանեցյանն արձագանքեց. «Գաղտնալսման համար պետք է ունենանք հիմքեր եւ դատարանի թույլտվություն։ Գաղտնալսումը շատ սուր օպերատիվ հետախուզական միջոցառում է, որը իրականացվում է ծայրահեղ դեպքում։ Գաղտնալսումը իմ կամ մեր մյուս աշխատակիցների քմահաճույքով իրականացվող օպերատիվ հետախուզական միջոցառում չէ։ Պետք է լինեն հիմքեր, որոնք ներկայացվեն դատարան եւ դատարանից ստացվի համապատասխան թույլտվություն։ Բայց հավաստիացնում եմ, որ ԱԱԾ ողջ անձնակազմն օր ու գիշեր աշխատում է, որ փորձենք բացառել ընտրախախտումները եւ հիմնականում ընտրակաշառքի դեպքերը, որ ունենանք ՀՀ պատմության մեջ աննախադեպ ընտրություններ»։
Լրագրողները հետաքրքրվեցին՝ կան արդեն տեսադաշտում մարդիկ, որոնք ընտրակաշառք բաժանելու փորձեր են անում, ինչիյն ի պատասխան ԱԱԾ տնօրենը նշեց. «Կան մարդիկ, կան մարդկանց խմբեր, որոնք փորձում են իրականացնել նախապատրաստական աշխատանքներ ընտրակաշառք բաժանելու ուղղությամբ, բայց ձեզ ասեմ, որ շահարկումներ չլինեն՝ դա ոչ թե կուսակցությունների կենտրոնական գրասենյակներից տրվող հանձնարարության շրջանակներում է, այլ արջի ծառայություն մատուցող տարբեր փոքր խմբեր են տարբեր տարածքներում»։
ԱԱԾ տնօրենը կոչ արեց նրանց հրաժարվել ընտրակաշառքների մտքից. «Մեր ձեռքերը երկար են, մենք ամեն ինչ տեսնում ենք»,–նշեց նա, ապա հավելց, որ կան շրջանակներ, որոնք ԱԱԾ հսկողության տակ են։
Հարցին՝ խոսքը թաղային հեղինակությունների մասի՞ն է, Վանեցյանը նկատեց, որ «թաղային հեղինակությունները պետք է որ դուրս եկած լինեին մեր լեքսիկոսնից, թաղային հեղինակություններ չկան»։
Վանեցյանը մանրամասնեց, որ խոսքը տարբեր ռեյտինգային թեկնածուների մասին է. «Ռեյտինգային թեկնածու ա, մտածում են ինչպես ձայն հավաքեն, գնում են, մարդիկ են գտնում, ասում են՝ փող տանք ընտրեք, պայմանավորվածություններ են ձեռք բերում։ Այ հենց կհասնենք այդ մասին, երբ կլինի կոնկրետ առաջարկ, պայմանավորվածություն, խոստում, այդ մարդիկ կենթարկվեն պատասխանատվության»։
Նշենք, որ արտահերթ խորհրդարանական ընտրությունները կկայանան դեկտեմբերի 9-ին։