«Գազպրոմ Արմենիա»-ի հիմնադիրը՝ ռուսական «Գազպրոմը», չի պատրաստվում 2019թ. հետո վնասներ կրել. Հրանտ Թադևոսյան (տեսանյութ)

Հայաստանի ներկրվող գազի գնի վերաբերյալ ավարտական արդյունք չկա: Այս մասին լրագրողների հետ զրույցում ասաց «Գազպրոմ Արմենիա» ընկերության տնօրեն Հրանտ Թադևոսյանը:

«2016թ. երկու անգամ գազի սակագնի նվազեցում ենք արել: Սակագնի նվազման համար հիմք են ընդունում գազի ներկրման գինն ու մարժան: Գազի ներկրման գինը որոշվել ու որոշվում է միջպետական կառավարական համաձայնագրերով: Այս փուլում ՀՀ կառավարությունը վարում է բանակցություններ Ռուսաստանի կառավարության հետ, և մենք չենք մասնակցում այս գործընթացին: Այդ համաձայնագրերի արդյունքում սահմանվում է գին, որը հիմք է «Գազպրոմ Արմենիա»-ի համար, որ մենք կնքենք պայմանագիր: Ներկա փուլում 2019թ. ՀՀ ներկրվող գազի գնի վերաբերյալ ավարտական արդյունք չկա»,- ասաց Թադևոսյանը:

Հարցին՝ չկա՞ գազի սակագինն իջեցնելու հնարավորություն, «Գազպրոմ Արմենիա» ընկերության տնօրենը պատասխանեց. «Գազի համար Հայաստանի սահմանին վճարվում է 150 ԱՄՆ դոլար՝ 1000 խորանարդ մետրի դիմաց: Իսկ սպառողներին միջինը վաճառվում է 255 դոլարով, և իրենք պատրաստ են բոլորին էլ վաճառել նույն գնով»,- մանրամասնեց Հրանը Թադևոսյանը:

Նա ասաց, որ իրենք «Գազպրոմ»-ից 13.6 միլիարդ գումար են վերցնում, որ ամբողջապես հոգան իրենց ծախսերը: «Մենք վնասով ենք աշխատում: Ճոխ աշխատավարձերը, ինչպես դուք եք բնութագրում, 7.5 միլիարդ, ստանում ենք «Գազպրոմ»-ից: 227 հազար դրամը մեր միջին աշխատավարձն է: Այս գումարը նվեր ենք ստանում: 22.5 միլիարդի պակաս մուտքեր ունենք, որ իջեցնենք՝ կդառնա 50, ո՞վ կանի, ո՞ր բիզնեսմենը կանի:

Մենք իջեցրել ենք, կրում ենք վնասները: Հիմա հիմնադիրը չի պատրաստվում 2019թ. հետո կրելու վնասները: Քո հարևանը ամեն ամիս տալիս է 13.4 միլիարդ, աշխատավարձերի համար 7.5 միլիարդ, ուսումնական համալիր է սարքում: Ու ո՞նց եք պատկերացնում այս աշխատանքը, որ շարունակելու են նորից տա՞լ՝ ինչի՞ համար, իմ սիրուն աչքերի համա՞ր, ձեր սիրուն աչքերի համա՞ր»,- շեշտեց նա:

Թադևոսյանն ասաց, որ գազի սակագինը կախված է որակից, անվտանգությունից: Հարցին՝ հնարավո՞ր է գազի գինը թանկանա, նա պատասխանեց. «Եթե դուք ուզում եք լավ շոր առնել, բացառո՞ւմ եք, որ կթանկանա: Եթե ուզում եք վատ շոր առնել՝ բացառո՞ւմ եք, որ կէժանանա»: