Որևէ կուսակցություն չպետք է միշտ լինի իշխանություն. Վիգեն Սարգսյան

Որոշումը կայացված է մասնակցելու ԱԺ արտահերթ ընտրություններին։ Այս մասին, այսօր՝ նոյեմբերի 11-ին, ՀՀԿ խորհրդի նիստից հետո լրագրողների հետ զրույցում նշեց պաշտպանության նախկին նախարար Վիգեն Սարգսյանը, ով այդ նիստում ընտրվել է ՀՀԿ առաջին փոխնախագահ։

Նրա խոսքով, Խորհրդի նիստում ընդունվել է բանաձև, որտեղ ներկայացված են ՀՀԿ մոտեցումները երկրում տեղի ունեցող զարգացումների, գործող կառավարության արձանագրած արդյունքներին եւ այն խնդիրներին, որոնք մենք տեսնում ենք մեր կուսակցության քաղաքականության եւ գաղափարական մոտեցումների տեսակետից, այն խնդիրները, որ իրենք արձանագրում են իրենց նախկին գործունեության մեջ։

«Տրված է երկրում տեղի ունեցող իրադարձություններին մեր գնահատականը, որովհետեւ այս 6 ամիսները լի էին իրադարձություններով, որոնք ունեն վճռորոշ նշանակություն մեր երկրի պատմության մեջ։ Նաեւ գնահատված է ՀՀԿ իշխանության տարիներին հիմնական ձեռքբերումները, որը մենք համարում ենք կուսակցության ներդրումը երկրի առաջընթացի մեջ։ Այնուհետեւ տրված է հիմնավորում, թե ինչով է պայմանավորված մեր որոշումը՝ մասնակցել արտահերթ ընտրություններին»,-ասաց Վիգեն Սարգսյանը։

Նրա խոսքով, ՀՀԿ-ն այսօր մի հետաքրքիր գործընթացի միջով է անցնում. «Դա կարգավիճակի տրանսֆորմացիան է։ ՀՀԿ-ն երկար ժամանակ իշխանություն լինելով, հիմա նոր ընդդիմության կարգավիճակով իր ներդրումը բերելու ուղիներն է որոնում՝ իր գիտելիքներն ու փորձը հետագա առաջընթացի համար օգտագործելու հնարավորության ուսումնասիրությունն է»։ Վիգեն Սարգսյանն ընդգծեց, որ քիչ է հիշում օրինակներ, որ հետխորհրդային երկրներում կուսակցությունները խուսափելով այդպիսի տրանսֆորմացիայից կարողացել է շարունակել իր ներդրումը ունենալ երկրի ապագայի հարցում։

«Որևէ կուսակցություն չպետք է միշտ լինի իշխանություն։ Այդտեղից բխում է, թե արդյոք իշխանափոխությունը, լինի ընտրությունների արդյունքում, թե բողոքների արդյունքում, պետք է բերի քաղաքական դաշտի դեֆոլտի։ Արդյոք ամեն անգամ, երբ իշխող կուսակցությունը դադարում է լինել իշխող, արդյոք ամեն ինչ պետք է զրոյացվի եւ զրոյից սկսենք կառուցել նոր կուսակցություններ, նոր շարժումներ եւ այլն»,-նշեց Վիգեն Սարգսյանը։

Նա ընդգծեց, որ ՀՀԿ-ն քաղաքական շատ ամուր թիմ է, որը կարող է դիմակայել բարդ իրավիճակներին եւ գոնե այն մարդիկ, որոնք ՀՀԿ-ի կորիզն են կազմում եւ առաջիկա ընտրություններում լինելու են ցուցակի առանցքում, եղել են կուսակցությունում ոչ այն պատճառով, որ կուսակցությունը եղել է իշխանություն։ «ՀՀԿ-ն ունի գաղափարական օրակարգ, որն այսօր ավելի է պահանջված, քան երբեւէ։ Առաջիկա ընտրություններին վերաբերում ենք հետեւյալ կերպ. դրանք չափազանց արագացված են, որը խաթարում է քաղաքական գործընթացները, որը թույլ չի քաղաքական ուժերին վերադասավորվել։ Մեզ ավելի հեշտ է դա անել, որովհետեւ մենք ունենք կառույցներ, փորձ, բայց խնդիրը միայն մեր մեջ չէ, այլ բոլորի պատրաստվածության մասին է»,-ընդգծեց նա։