Հայտնի է «Չարբախի փոսում» կատարված դանակահարությունների պատճառը (տեսանյութ)
Հոկտեմբերի 1–ին «Չարբախի փոսում» կատարված դանակահարությունների պատճառը ազգականների միջև տեղի ունեցած վեճն է։ Ոստիկանությունից հայտնում են, որ հոկտեմբերի 1–ին ոստիկանության բաժնում ահազանգ է ստացվել, որ կտրող–ծակող գործիքից ստացած տարբեր աստիճանի մարմնական վնասվածքներով բժշկական կենտրոն բուժօգնության են դիմել միանգամից 5 քաղաքացի, ովքեր Շենգավիթ վարչական շրջանի Չարբախի փոս կոչվող տարածքի բնակիչներ են, իսկ մարմնական վնասվածքները ստացել են նույն շրջանի Տիմիրյազևի փողոցի 65 հասցեի մոտ։
Ձեռնարկված միջոցառումների արդյունքում ոստիկանության Չարբախի բաժանմունք են բերման ենթարկվել կասկածյալները՝ Տիմիրյազևի փողոցի տներից մեկի բնակիչ Նազարեթ, Մեսրոպ և Անդրեաս Սարգսյան եղբայրներն ու նրանց հայրը։
Անդրեաս Սարգսյանը ոստիկաններին հայտնել է, որ վիճաբանության ժամանակ դանակով հարվածել է առնվազն երկու հոգու։
Ոստիկանների իրականացրած միջոցառումների արդյունքում պարզվել է, որ վեճը սկսվել էր, երբ ազգականներից մեկը դիտողություն էր արել եղբայրներին՝ մեքենան արագ վարելու համար։ Եղբայրները դիտողությունն անպատասխան չէին թողել. ծագած վեճին էին ներգրավվել նաև հարևաններն ու ընկերները։ Ըստ որոշ տվյլաների՝ նրանց միջև անհանդուրժողականությունն ու անհամաձայնությունները տարիների պատմություն ունի։
Հիշեցնենք, որ դեպքի առթիվ 2018թ. հոկտեմբերի 2-ին ՀՀ քննչական կոմիտեի ԵՔՔՎ Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 258-րդ հոդվածի 4-րդ մասով, 112-րդ հոդվածի 2-րդ մասի 6-րդ կետով և 113-րդ հոդվածի 2-րդ մասի 1-ին և 3-րդ կետերով:
Գործով կասկածյալներ Նազարեթ և Զոհրաբ Սարգսյանները ստորագրությամբ բաց են թողնվել, իսկ Մեսրոպ և Անդրեաս Սարգսյանները կալանավորվել են։ Հանցագործության գործիք դանակը հայտնաբերվել և առգրավվել է։
Քննությունը շարունակվում է։