Փաշինյանը կոչ արեց քաղաքացիներին պահպանել իրենց ազատությունն ու իրավունքները (տեսանյութ)

Արմավիրի մարզի Էջմիածին քաղաքի 2703-ամյակին նվիրված տոնակատարություններին մասնակցեց ՀՀ վարչապետ Նիկոլ Փաշինյանը:

Վարչապետը շրջեց քաղաքի հրապարակում տեղադրված տաղավարների մոտով, ծանոթացավ տեղի բնակիչների ձեռքի աշխատանքներին և բերք ու բարիքին: Միջոցառումներին ներկա էին նաև ՀՀ տարածքային կառավարման և զարգացման, մշակույթի, կրթության և գիտության նախարարները:

«Սիրելի էջմիածնեցիներ, ուրախ եմ, որ ձեզ տեսնում եմ այսպիսի բարձր տրամադրությամբ: Այսօր Հայաստանում դեռ կան գյուղեր, նույնիսկ քաղաքներ, որոնց բնակիչները բողոքում են, որ հեղափոխությունն իրենց քաղաք չի հասել, բայց կարծում եմ՝ Էջմիածինը հենց այն քաղաքն է, որը գիտի և տեսնում է, որ հեղափոխությունը ոչ միայն հասել է, այլև հաղթել է: Այսօր Էջմիածնի քաղաքացուն որևէ մեկը չի կարող ասել, որ «աչքիդ վերևը հոնք կա», որովհետև էջմիածնեցին ազատ է, հաղթական է, հպարտ է ու հզոր»,- իր ելույթում ասաց Փաշինյանը:

Վարչապետի խոսքով՝ էջմիածնեցիներն ամենաշատը գիտեն ազատության գինը:
«Որպես Հայաստանի Հանրապետության պատմության ողջ ընթացքում նախկին լրագրող, քաղաքական գործիչ, քաղբանտարկյալ, պատգամավոր, ուզում եմ բոլոր էջմիածնեցիներից ներողություն խնդրել այն տարիների համար, որ մենք չենք կարողացել օգնել այնպես, ինչպես պետք է օգնեինք: Բայց, ի վերջո, մենք գիտեինք, որ քայլ առ քայլ գնում ենք դեպի ազատություն և դեպի օրինականություն»,- նշեց վարչապետը:

Նա հույս հայտնեց, որ տեղի բնակիչները կպաշտպանեն իրենց այս ազատությունն ու իրավունքները և այլևս թույլ չեն տա, որ ոչ միայն Էջմիածնում, այլ նաև ընդհանրապես Հայաստանում ի հայտ գան բդեշխներ, ովքեր պետք է որոշեն, թե իրենք ինչպես պետք է ապրեն: «Այսօր Հայաստանի Հանրապետությունում հաստատված է օրինականություն և ազատություն, այսօր Հայաստանի քաղաքացին իրեն զգում է հաղթանակած: Ցավոք, Հայաստանում դեռ կան ուժեր, կան քաղաքական կուսակցություններ, որոնք իրենց վատ են զգում ժողովրդի համատարած լավ զգալու պայմաններում, որոնք դեռ ուզում են մարդկանց անվստահություն ներշնչել, որոնց մտքով նույնիսկ անցնում է ժողովրդի հաղթանակը խլել ժողովրդի ձեռքից»,- ընդգծեց Փաշինյանը:

Դիմելով էջմիածնեցիներին՝ վարչապետը նաև նկատեց, որ հոգևոր կենտրոն համարվող իրենց քաղաքն ամեն ինչով պետք է համապատասխանի իր կոչմանը: «Սա այն տեղն է, որտեղ իջել է Հիսուս Քրիստոսը, սա սուրբ հող է, և այս հողի սրբությունը մենք պետք է պաշտպանենք, պահպանենք: Սա մեր ժողովրդի հոգևոր վերածննդի հեղափոխություն է նաև»,- ասաց Նիկոլ Փաշինյանը:

Ելույթից հետո, ՀՀ վարչապետը, համաձայն ավանդույթի, պետք է Էջմիածնի քաղաքապետի պաշտոնակատար Դիանա Գասպարյանին հանձներ Էջմիածին քաղաքի բանալին: Նրանք միասին որոշում կայացրին հանձնել այն ժողովրդին, քանի որ ժողովրդի ձեռքում է իշխանությունը:

Այս ամենից հետո Փաշինյանը ուղևորվեց Մայր Տաճար: