Թուրքիան կրճատում է ջրի հոսքը Ախուրյանի ջրամբար. Ինեսսա Գաբայան
Սևանից լրացուցիչ ջրառը երկու լուծում ունի. կամ կրճատել հավելյալ ջրառը Սևանից, կամ ավելացնել ջրի տեղափոխումը դեպի Սևանա լիճ: Այս մասին, այսօր՝ սեպտեմբերի 28-ին, Ազգային ժողովում «Սևանա լճի հիմնախնդիրները» թեմայով խորհրդարանական լումների ժամանակ նշեց ՀՀ էներգետիկ ենթակառուցվածքների և բնական պաշարների նախարարության ջրային կոմիտեի նախագահ Ինեսսա Գաբայանը:
Նրա խոսքով, այսօր ոչ թե խնդիրը սակավաջրության հետ է կապված, այլ նաև պետք է հաշվի առնել մեր ջրային բալանսում ջրի կրճատումները, որ տեղի են ունեցել վերջին տարիներին: «Մասնավորապես, Թուրքիան վարում է ջրի հոսքերը դեպի Ախուրյանի ջրամբար եւ Արաքս գետը կրճատելու քաղաքականությունը: Այս տարի Թուրքիայում ավարտվել է եւս մեկ ջրամբարի կառուցում Կարսաչայ գետի վրա: Փաստ է, որ այդքան չափով կրճատվելու է ջրի հոսքը Ախուրյանի ջրամբար»,-ասաց Գաբայանը:
Երկրորդ խնդիրը, ըստ նրա, Արարատյան դաշտում արտեզյան պաշարների հյուծումն է, որի պատճառը ձկնաբուծության ծավալների անասելի աճն է. «Ձկնաբուծության համար արտահանվում է ավելի շատ ջուր՝ 800 մլն խմ, քան մեր ջրամբարներում մենք ամբարում ենք՝ 700 մլն: Ձկնաբուծության զարգացման հետեւանքով չորացել է Սեւջուր գետը, որը ժամանակին ոռոգելի տարածքներին մեծ ծավալով ջուր էր ապահովում»,- ասաց նա՝ հավելելով, որ Արփի լճում եւս կորցնում ենք 35 մլն խմ ջուր:
Կոմիտեի նախագահը նշեց, որ առաջնային խնդիրներից է նաեւ հիմնական ջրակետերում ժամանակակից ջրաչափերի համակարգերի տեղադրումը:
Ինչ վերաբերում է թաքնված կամ գաղնի այգիներին, Գաբայանը նկատեց. «Իհարկե, այդպիսի հողեր կան, բայց էստեղ մեկ այլ հարց կա: Որքան էլ թաքնված հողեր ունենանք, դրանց բացահայտումը ջրի կրճատման չի տանելու, որովհետեւ եթե կա այգի, այն պետք է ջրվի»: