«Լույս» հիմնադրամը նույնությամբ չի լինի, ինչ-որ բաներ կփոխվեն. Աննա Հակոբյան

Մենք այժմ քննարկումների փուլում ենք «Լույս» հիմնադրամին համարժեք որևէ կառույց ստեղծելու կամ «Իմ քայլը» հիմնադրամի շրջանակներում շարունակելու համար։ Այս մասին  օգոստոսի 7-ին, լրագրողների հետ հանդիպմանը հայտարարեց ՀՀ վարչապետի տիկին Աննա Հակոբյանը։

«Իհարկե, պարզ է, որ «Լույս» հիմնադրամը նույնությամբ չի լինի, ինչ–որ բաներ կփոխվեն, մենք ուսումնասիրությունների արդյունքում կգանք այն եզրակացության, որը լավագույնը կլինի մեզ համար, հաշվի կառնվեն այն մասնագիտությունները, որոնք անհրաժեշտ են պետությանը»,–նշեց նա։

Անդրադառնալով «Լույս» հիմնադրամի գործունեության դադարեցման հարցում սաբոտաժի տարրերին՝ Աննա Հակոբյանը շեշտեց՝ հնարավոր չի սաբոտաժի տարրեր չգտնել, սակայն մյուս կողմից այն մեթոդաբանությամբ, որով հիմնադրամը աշխատել էր, այլևս հնարավոր չէր նոր իրողության պայմաններում աշխատել. «Լույս» հիմնադրամի գործունեության դադարեցումն ինչ–որ առումով պարտադրված էր, որովհետև դժվար էր պատկերացնել, որ այդ հիմնադրամի կառավարիչները կարողանային արագ հարմարվել և նոր իրողություններում լուծումներ գտնեին»։

Աննա Հակոբյանը կասկածի տակ դրեց հիմնադրամի ֆինանսական միջոցների ստացման մեթոդները, դրանց արդար ճանապարհով հայթհայթումը։

Նա կարևորեց ուսումնարության ավարտից հետո հայրենիք վերադարձի հարցը, ինչպես նաև, ըստ օրենքի, բանակում ծառայելը։

Նա նշեց, որ մինչև նոյեմբերի վերջ կամ դեկտեմբերի սկիզբ այդ հարցով հայտարարությամբ հանդես կգան, որ ուսանողները հասկանան անելիքները, ապա նաև չբացառեց որ այն 18 ուսանողին, որ օգնել են այս տարի, կշարունակեն աջակցել նաև հետագայում։

«Մենք սկսել ենք քննարկում AGBU-ի հետ, ինչպես նաև շատ այլ շահագրգիռ կողմերի հետ քննարկումներ կանցկացնենք, որպեսզի հասկանանք՝ ինչպես պետք է այս հարցը հիմնավոր լուծում ստանա»,-նշեց նարչապետի տիկինը։

«Լույս» հիմնադրամի կրթական ծրագրի գործադիր տնօրեն Ժաքլին Կարաասլանյանը մայիսի 10-ին հայտարարել էր իր և հիմնադրամի աշխատակազմի գործունեության դադարեցման մասին: «Ցանկանում եմ վստահեցնել «Լույսի»՝ ուսումը շարունակող կրթաթոշակառուներին և 2018-2019 ուստարվա համար արդեն դիմած, կրթաթոշակի ծրագրի պայմաններին բավարարող երիտասարդներին, որ նրանց այս տարի ևս կշնորհվի կրթաթոշակ»,- ասված էր բաց նամակում: