Ե՞րբ պետք է անցկացվեն Երևան քաղաքի ավագանու արտահերթ ընտրություններ

Քանի որ Երևանի քաղաքապետ Տարոն Մարգարյանը երեկ՝ հուլիսի 9-ին հրաժարականի դիմում ներկայացրեց  Երևանի քաղաքապետի պաշտոնից, պետք է անցկացվի Երևան քաղաքի ավագանու արտահերթ ընտրություններ՝ նոր քաղաքապետ ընտրելու համար:

Այսպիսով՝ «Երևան քաղաքում տեղական ինքնակառավարման մասին ՀՀ օրենքի» 45-րդ հոդվածի 2-րդ կետի 3-րդ ենթակետի համաձայն՝ Քաղաքապետի լիազորությունները վաղաժամկետ դադարում են, եթե նա հրաժարական է տվել:

Նույն օրենքի 46-րդ հոդվածի 1-ին կետի համաձայն՝ Քաղաքապետի պաշտոնը թափուր մնալուց հետո ավագանու սահմանած ժամկետում, սակայն ոչ ուշ, քան մեկամսյա ժամկետում, անցկացվում են քաղաքապետի արտահերթ ընտրություններ` քաղաքապետի ընտրությունների համար սահմանված կարգով:

Նույն հոդվածի 2-րդ կետի համաձայն՝ Արտահերթ ընտրությունների ժամանակ քաղաքապետի թեկնածուներ առաջադրելու իրավունքը պատկանում է ավագանու խմբակցություններին:

Արտահերթ ընտրություններն անցկացվում են սույն օրենքի 44-րդ հոդվածի 4-6-րդ մասերով սահմանված կարգով:

Նույն օրենքի 17-րդ հոդվածի 2-րդ կետի համաձայն՝ Կառավարությունը կրճատում է ավագանու լիազորությունների ժամկետը, եթե սույն օրենքի 44-րդ հոդվածով սահմանված կարգով նիստը գումարելուց հետո` երկշաբաթյա ժամկետում, քաղաքապետի թեկնածու չի առաջադրվում, կամ առաջադրված մեկ թեկնածուն չի հավաքում անհրաժեշտ թվով ձայներ:

Նույն հոդվածի 6-րդ կետի համաձայն՝ Ավագանու արտահերթ ընտրությունն անցկացվում է ավագանու լիազորությունների ժամկետը կրճատելուց հետո ոչ շուտ, քան 30, և ոչ ուշ, քան 40 օրվա ընթացքում:

Արտահերթ ընտրությունից հետո նորընտիր ավագանու նիստը հրավիրվում է ընտրության արդյունքների պաշտոնական հրապարակումից հետո` 10-րդ օրը:

Վերը նշվածից հետևում է, որ եթե առաջիկա մեկ ամսվա ընթացքում ավագանու անդամներից որևէ մեկը չառաջադրվի որպես քաղաքապետի թենածու, կամ առաջադրված մեկ թեկնածուն չհավաքի անհրաժեշտ թվով ձայներ, այլ կերպ ասած, եթե Երևան քաղաքի ավագանին առաջիկա մեկ ամսվա ընթացքում չընտրի Երևանի նոր քաղաքապետ, ապա Կառավարությունը իրավունք կստանա կրճատելու ավագանու լիազորությունների ժամկետը, որից ոչ շուտ, քան 30, և ոչ ուշ, քան 40 օրվա ընթացքում կանցկացվեն Երևան քաղաքի ավագանու արտահերթ ընտրություններ:

Այսինքն՝ ամենաուշը մինչև սեպտեմբերի 20-ը պետք է անցկացվեն Երևան քաղաքի ավագանու արտահերթ ընտրություններ: