Իսպանիայում հայտնի են դարձել «հայ-վրացական մաֆիայի» մասին նոր մանրամասներ

Եվրոպայում խոշորագույն կազմակերպված հանցախմբերից մեկը, որը չեզոքացվել էր հունիսի վերջին, զբաղվել է թալանով, փողերի լվացումով, պայմանավորված հանդիպումների կազմակերպմամբ, Արևելյան Եվրոպայից Արևմտյան Եվրոպա ծխախոտի մաքսանենգությամբ: Այս մասին Մադրիդում մամուլի ասուլիսում հայտնել են Իսպանիայի ազգային ոստիկանության ներկայացուցիչները, հաղորդում է «ՌԻԱ Նովոստին»:

Իսպանիայում հունիսի 26-ին ազգային ոստիկանությունը հաղորդել էր Եվրոպայում Հայաստանից ներգաղթած խոշորագույն քրեական խմբավորման՝ այսպես կոչված «հայկական մաֆիայի» դեմ իրականացված լայնամասշտաբ գործողությունների մասին:

Հինգշաբթի մամուլի ասուլիսի ժամանակ իսպանական իրավապահ մարմինների ներկայացուցիչները հաղորդել են գործողության մանրամասների մասին:

Ընդհանուր առմամբ ձերբակալվել է 129 մարդ, կատարվել է 74 խուզարկություն՝ Մադրիդում, Բարսելոնում, Վալենսիայում, Ալիկանտեում, Ալբասետեում, Մուրսիում, Ժիրոնում, Գրանադայում:

Կասկածյալները մեղադրվում են կոռուպցիայի, շորթման, զենքի ապօրինի պահպանման, թմրամիջոցների շրջանառության, փողերի լվացման, բնակարանների կողոպուտի, ծխախոտի մաքսանենգության, փաստաթղթերի կեղծման, խարդախության, ավտոմեքենաների անօրինական տեղափոխման մեջ:

Խուզարկության ընթացքում հայտնաբերվել է 100,000 եվրո կանխիկ գումար, ինը միավոր հրազեն, փամփուշտներ, զրահապատ բաճկոններ, թանկարժեք մետաղների վերաձուլման սարքավորում, մեծ քանակությամբ ծխախոտ:

Ոստիկանությունում հայտնել են, որ խմբավորման անդամները շահարկել են տարբեր մարզական միջոցառումների արդյունքները: Մասնավորապես, կաշառել են մարզիկներին, հետխորհրդային տարածքում բասկետբոլի, լողափի վոլեյբոլի, հոկեյի և թենիսի պայմանավորված հանդիպումներ են կազմակերպել: Անօրինական գործողություններին մասնակցել է շուրջ 20 մարզիկ:

Բացի այդ, Վալենսիայում և Ալիկանտեում խմբավորման անդամները զբաղվել են տների կողոպուտով, Ուկրաինայից մաքսանենգության ճանապարհով ծխախոտ են մատակարարել Լեհաստան, Ֆրանսիա, Իտալիա և Իսպանիա, ապօրինի ճանապարհով Բելգիայից և Գերմանիայից ավտոմեքենաներ են տեղափոխել և վաճառել Իսպանիայում:

Հետաքննությունը սկսվել էր 2016 թվականին Տարասայում (Կատալոնիա) Վրաստանի երկու քաղաքացիների կրկնակի սպանության հետ կապված: Քաղաքացիները կապված էին հանցավոր խմբավորման հետ, որը գլխավորում էր «օրենքով գող» Կախաբերի Շուշանաշվիլին, որն այս պահին իր պատիժը կրում է Ֆրանսիայի բանտում:

2017-ի նոյեմբերին գործողության առաջին փուլում այսպես կոչված «վրացական խմբավորումից» ձերբակալվել էր 30 մարդ: Գործողության երկրոդ մասը ուղղված էր հայկական խմբավորման չեզոքացմանը:

Խմբավորման անդամները կապեր ունեին ԱՄՆ-ում, Ֆրանսիայում, Իտալիայում, Բելգիայում և Լիտվայում:

Գործողությանը բացի Իսպանիայի Ազգային ոստիկանությունից և Կատալոնիայի Mossos d'Esquadra իրավապահ մարմիններից մասնակցել են Վրաստանի, Ինտեպոլի և Եվրոպոլի քրեական ոստիկանությունը: