Իշխանությունը չպետք է նոր խորհրդարանում 60 տոկոսից ավելի մանդատ ունենա. ՀՅԴ
ՀՅԴ-ն առաջարկում է ձեւավորել ընտրական մասնագիտացված հանձնաժողովների համակարգ՝ ընտրությունների համար կոնկրետ հասցեական պատասխանատվություն սահմանելու նպատակով։ Այս մասին, այսօր՝ հուլիսի 4-ին, Ընտրական օրենսգրքի շուրջ ձեւավորված ԱԺ աշխատանքային խմբի առաջին նիստի ժամանակ նշեց ՀՅԴ խմբակցության ղեկավար Արմեն Ռուստամյանը:
«Միաժամանակ ընտրություններին մասնակցող կուսակցություններին կամ կուսակցությունների դաշինքներին, վստահված անձանց միջոցով լիազորություն տալ լիարժեք հսկողություն իրականացնելու տեղամասային ընտրական հանձնաժողովների նկատմամբ»,-ասաց նա:
Ռուստամյանի խոսով, աշխարհում կա երկու ձեւ, մեկը, երբ ընտրությունները վերահսկում, ամփոփում են կուսակցությունների միջոցով ձեւավորված հանձնաժողովներով. «Այդ պարագայում այնպես է արվում, որ իշխանությունն ու ընդդիմությունը ունենան իրար հակակշռելու հնարավորություններ՝ հավասար քվոտաներով: Երկրորդ ձեւն այն է, որ իր վրա պատասխանատվություն է վերցնում պետությունը, մասնագիտացված հանձնաժողովներ են ստեղծվում»:
Նա ընդգծեց, որ ԿԸՀ-ն ասում է, որ կեղծիքները պետք է փնտրել տեղամասյին հանձնաժողովներում, իրենք միայն ամփոփում են արդյունքները, իսկ տեղամասերում էլ կուսակցությունները կոլեգիալ կառավարում են իրականացնում, ամեն մեկն իր մասով է հայտարարություն անում: «Մեր կարծիքով, պետք է վերեւից ներքեւ ունենալ մասնագիտացված հանձնաժողովներ, բայց տեղամասերում հանձնաժողովների անդամներին հավասար վստահված անձինք իրավունք ունեն գործողություններ անելու»,-ընդգծեց Ռուստամյանը:
ՀՅԴ-ի հաջորդ առաջարկը հետեւյալն է՝ կուսակցություններին կամ կուսակցությունների դաշինքներին տրվող մանդատների առավելագույն 2/3 շեմի նվազեցնել մինչեւ մանդատների ընդհանուր թվի 3/5-ը։ Նա հիշեցրեց, որ գործող օրենսգրքով որեւէ ուժ խորհրդարանում չի կարող 2/3-ից ավելի մանդատներ ունենալ, քանի որ ընդդիմությունը պետք է առնվազն 1/3 տեղ ունենա:
«Բայց ես կարծում եմ, որ մեկ քաղաքական ուժը խորհրդարանում չպետք է 60 տոկոսից ավելի տեղ ունենալ, որովհետեւ 2/3-ը այդ ուժին հնարավորություն է տալիս միանձնյա Սահմանադրություն փոխել: Չպետք է թույլ տրվի, որ մեկ ուժը միայան կարողանա Սահմանադրություն փոխել: Դրա համար առաջարկում ենք, որ մեկ ուժին տրվող առավելագույն ձայների քանակը 60-ից ավելի չլինի, լինի 60-40 հարաբերակցություն:
ՀՅԴ-ի հաջորդ առաջարկությունն է՝ բազմակի քվեարկությունները բացառող համապետական միասնական ցանցի ստեղծում։ «Մենք կողմ ենք ցանկացած լուծման, որը կբացառիկրկնակի քվեարկությունը»: